ភ្នំពេញៈ នាយនគរបាលផ្កាយពីរម្នាក់ ដែលល្មើសវិធានការបិទខ្ទប់របស់រាជរដ្ឋាភិបាល ហើយបន្ដ ផឹកស៊ីច្រៀងលេងសប្បាយដែលត្រូវបានចាប់ខ្លួនកាលពីយប់មិញនោះ ត្រូវបានដកស័ក្ដិ និងបណ្ដេញចេញពី ក្របខ័ណ្ឌមន្ដ្រីនគរបាលជាតិកម្ពុជា។ នេះបើតាមព្រះរាជក្រឹត្យរបស់ព្រះមហាក្សត្រ ដែលអង្គភាព គេហទំព័រ សង្គមសន្តិភាព(www.sksnews.net) ទទួលបាននៅរសៀលថ្ងៃទី១៧ ខែមេសា ឆ្នាំ២០២១នេះ។
ក្នុងព្រះរាជក្រឹត្យរបស់ព្រះមហាក្សត្រ មាត្រា១ បានត្រាស់បង្គាប់ថា «ដកហូតឋានន្ដស័ក្ដិ នាយនគរបាលថ្នាក់ឧត្តមសេនីយ៍ និងបណ្ដេញចេញពីក្របខ័ណ្ឌមន្ដ្រីនគរបាលជាតិកម្ពុជា ចំពោះ ឧត្តមសេនីយ៍ទោ អ៊ុង ថាន់ធូក អត្តលេខ៧៣៥៥៧ ក្របខ័ណ្ឌមន្ដ្រីនគរបាលជាតិកម្ពុជា»។
ក្រៅពីការដកស័ក្ដិហើយនោះ នាយនគរបាលរូបនេះ និងបក្ខពួក២នាក់ផ្សេងទៀត ក៏ត្រូវបញ្ជូនទៅកាន់សាលាដំបូងរាជធានីភ្នំពេញ ដើម្បីធ្វើការផ្ដន្ទាទោសតាមផ្លូវច្បាប់ផងដែរ ព្រោះតែល្មើសវិធានការបិទខ្ទប់របស់រាជរដ្ឋាភិបាល ដែលបានដាក់ចេញ ដើម្បីទប់ស្កាត់ការឆ្លងរីករាលដាលជំងឺកូវីដ១៩ នៅរាជធានីភ្នំពេញ និងក្រុងតាខ្មៅ ខេត្តកណ្ដាល។
សូមជំរាបថា កាលពីយប់មិញ កម្លាំងនគរបាលខណ្ឌមានជ័យ បានចាប់វាយខ្នោះឧត្តមសេនីយ៍ទោ អ៊ុង ចាន់ធួក អាយុ៤៥ឆ្នាំ មានតួនាទីជាអនុប្រធានសេធិការ នៃអគ្គស្នងការដ្ឋាននគរបាលជាតិ និងបក្ខពួក២នាក់ទៀត ដោយសារហ៊ានរៀបចំកម្មវិធីផឹកស៊ី រាំ ច្រៀង និងរហូតមានការលេងប៉ាតម្សៅ ជូនដល់អ្នកជួលបន្ទប់របស់គាត់ជាច្រើននាក់ផងដែរ៕SKS
