ព្រះវិហារៈ គ្រឿងចក្រមួយគ្រឿង និងសម្ភារមួយចំនួនទៀត ត្រូវបានរឹបអូសយកទៅរក្សាទុក ដើម្បីចាត់ការទៅតាមផ្លូវច្បាប់ បន្ទាប់ពីលោក វុធ សាវី ព្រះរាជអាជ្ញារងអមសាលាដំបូងខេត្តព្រះវិហារ បានដឹកនាំកម្លាំងបរិស្ថាន ចុះបង្រ្កាបករណីឈូសឆាយដីព្រៃមួយកន្លែង នៅចំណុចភូមិអភិវឌ្ឍន៍ ព្រៃគោល ឃុំស្រយ៉ង់ ស្រុកគលែន ខេត្តព្រះវិហារ នាថ្ងៃទី៩ ខែមីនា ឆ្នាំ២០២១កន្លងទៅនេះ។
លោក វុធ សាវី បានប្រាប់អង្គភាព(គេហ៌ទំព័រ សង្គមសន្តិភាព) ឱ្យដឹងនៅថ្ងៃទី១០ ខែមីនា ឆ្នាំ២០២១នេះថា ក្រោមការសម្របសម្រួលនិងណែនាំពីលោក ទី សុវិនថាល់ ព្រះរាជអាជ្ញា ខេត្តព្រះវិហារ នៅថ្ងៃម្សិលមិញ លោកបានដឹកនាំមន្ត្រីបរិស្ថាន ចុះបង្រ្កាបករណីឈូសឆាយ ដីព្រៃដោយ ខុសច្បាប់ មួយកន្លែង នៅចំណុចភូមិឃុំខាងលើ និងបានដកហូតវត្ថុតាងគ្រឿងចក្រម៉ាក X (អ៊ិច)១គ្រឿង និងសម្ភារមួយចំនួនទៀតយកទៅ រក្សាទុកនៅស្នាក់ការបរិស្ថានតាកឹង។
លោកព្រះរាជអាជ្ញារង បានបញ្ជាក់ឱ្យដឹងយ៉ាងដូច្នេះទៀតថា ស្របពេលដែលលោកដឹកនាំកម្លាំង ចុះទៅដល់កន្លែងឈូសឆាយដីព្រៃ ដើម្បីសួរនាំរកលិខិតស្នាមនោះ បុគ្គលម្នាក់ដែលជាម្ចាស់ដី ហើយមើលមកលោកច្រឡំថា ជាអ្នកសារព័ត៌មាន ក៏បានទូរស័ព្ទអន្តរាគមន៍ទៅអ្នកធំម្នាក់ហើយ បើកស្ពីកឃ័រឱ្យលោកស្តាប់ទៀត (ដែលសម្លេងអ្នកធំនោះលោកបានថតជាប់អស់ហើយ) លុះពេលលោកប្រាប់ថា មិនមែនជាអ្នកសារព័ត៌មាន លោកជាព្រះរាជអាជ្ញារងខេត្តព្រះវិហារ ស្រាប់តែបុគ្គលនោះហាក់រៀងបន្ទន់ចិត្តឈប់អួតអាង ហើយក៏បានដាក់មេប្រូចបាត់ទៅ។
លោក វុធ សាវី បានគូសបញ្ជាក់ថា បច្ចុប្បន្ននេះ លោកកំពុងរៀបចំលិខិតកោះអញ្ជើញបុគ្គលរូបនោះ មកបំភ្លឺនៅអយ្យការអមសាលាដំបូងខេត្តហើយ ដើម្បីយកចម្លើយ ឈានទៅកោះហៅអ្នកនៅពីក្រោយ ខ្នងមួយចំនួនទៀតផងដែរ៕ដោយ សេង ពិសិដ្ឋ
