កំពង់ចាម : ដើម្បីចូលរួមទប់ស្កាត់ការឆ្លងរីករាលដាលនៃ ជំងឺ កូវីដ -១៩ ចូលដល់ក្នុង សហគមន៍ នាព្រឹក ថ្ងៃ ទី ៨ ខែមិនា ឆ្នាំ ២០២១ នេះ ឯកឧត្តម អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជំងឺកូវីដ-១៩ បានដឹកនាំមន្ត្រី ពាក់ព័ន្ធ និងអាជ្ញាធរមូលដ្ឋាន អញ្ជើញចុះពិនិត្យទីតាំងដែល រក ឃើញ បុរសជនជាតិខ្មែរ ម្នាក់ មានករណីវិជ្ជមាន កូវីដ-១៩ មកស្នាក់នៅ ក្នុង ភូមិអូរកណ្ដោល ឃុំព្រែកក្របៅ ស្រុកកងមាស ខេត្តកំពង់ចាម ។
គួរបញ្ជាក់ផងដែរថា កាលថ្ងៃទី៥ ខែមីនា ឆ្នាំ២០២១ កន្លងទៅ ថ្មីៗ នេះបន្ទាប់ពីទទួលបាន សេចក្តីរាយការណ៍ពីអាជ្ញាធរមូលដ្ឋាន អំពីករណីបុរសម្នាក់ឈ្មោះ ស៊ឹម ស៊ីថាន អាយុ ២៧ឆ្នាំ ដែលមកពីតំបន់មានហានិភ័យខ្ពស់(ខេត្តព្រះសីហនុ) បានត្រឡប់មកផ្ទះ នៅភូមិអូរកណ្ដោល ឃុំព្រែកក្របៅ ស្រុកកងមាស (កាលពីថ្ងៃ០៤ ខែមីនា ឆ្នាំ២០២១) ឯកឧត្តមអភិបាលខេត្ត បានចាត់ ឲ្យ មន្ត្រី នៃមន្ទីរសុខាភិបាល នាំយកបុរសខាងលើ មកធ្វើចត្តាឡីស័ក នៅមណ្ឌល ច័ត្តឡីស័ករបស់រដ្ឋបាលខេត្ត (អតីតសណ្ឋាគារមេគង្គ) និងបានពិនិត្យសុខភាព ព្រមទាំងយក សំណាកពិនិត្យ នៅព្រឹកថ្ងៃទី៦ ខែមីនា ឆ្នាំ២០២១ រហូត ដល់ ថ្ងៃទី៧ ខែមីនា ឆ្នាំ២០២១ ទទួលបានការបញ្ជាក់ពីវិទ្យាស្ថានប៉ាស្ទ័រកម្ពុជា ថាបុរសខាងលើមានលទ្ធផលវិមាន ជំងឺ កូវីដ-១៩ ហើយបុរសខាងលើបច្ចុប្បន្នត្រូវបានបញ្ជូនទៅព្យាបាលនៅមន្ទីរពេទ្យខេត្តកំពង់ចាម។
ជាមួយ គ្នានោះ ឯកឧត្តម អ៊ុន ចាន់ដា អភិបាលខេត្ត កំពង់ចាម ក៏បានចាត់ឲ្យមន្ត្រីនៃមន្ទីរ សុខាភិបាលខេត្ត សហការជាមួយអាជ្ញាធរមូលដ្ឋាន បន្តចុះពិនិត្យស្រាវជ្រាវបន្ថែមទៀត រកអ្នកដែលពាក់ព័ន្ធនឹងករណីបុរសខាងលើ និងសូមអំពាវនាវដល់បងប្អូនដែលបានពាក់ព័ន្ធ ជាមួយ បុរសខាងលើ ទៅតាមពេលវេលា និងទីកន្លែងដែលបុរសខាងលើបានធ្វើដំណើរ ត្រូវ ទៅពិនិត្យសុខភាព និងយកសំណាក នៅតាមមន្ទីរពេទ្យបង្អែកដែលនៅជិតផ្ទះ និងត្រូវរាយការណ៍បន្ទាន់ទៅអាជ្ញាធរមូលដ្ឋាន ដើម្បីមានវិធានការបន្ទាន់៕សូមបងប្អូនអ្នកដែលពាក់ព័ន្ធទាំងអស់ ត្រូវអនុវត្តនូវវិធានការចាំ បាច់នានា តាមការណែនាំរបស់មន្ត្រីសុខាភិបាល ផងដែរ ៕
