កំពង់ធំ.ឯកឧត្តម ងួន រតនៈ អភិបាលខេត្តកំពង់ធំ ថ្លែងថាកងកម្លាំងប្រដាប់អាវុធសុខចិត្តបង្ហូរញើសនៅទីលានហ្វឹកហាត់ ប្រសើរជាងបង្ហូរឈាមនៅលើសមរភូមិប្រយុទ្ធ។
ឯកឧត្តម ងួន រតនៈ បានថ្លែងនៅក្នុងពិធីបាញ់គ្រាប់ពិតនៃកម្មវិធីហ្វឹកហ្វឺនរបស់មេបញ្ជាការតំបន់ប្រតិបត្តិការសឹករងកំពង់ធំ នៅបញ្ជាការដ្ឋានវរៈ១ ភូមិតាឡែក ឃុំសាលាវិស័យ នៅស្រុកប្រាសាទបល្ល័ង្ក ខេត្តកំពង់ធំ នៅថ្ងៃទី២៨ ខែកញ្ញា ឆ្នាំ២០២៣នេះ។
ឯកឧត្តម.បានលើកសរសើរដោយស្មោះដល់មេបញ្ជាការ មេបញ្ជាការរង នាយទាហាន នាយទាហានរងដែលបានអនុវត្តយ៉ាងខ្ជាប់ខ្ជួននូវតួនាទី ភារកិច្ចតាមបទបញ្ជារបស់អគ្គបញ្ជាការកងយុទ្ធពលខេមរភូមិន្ទក៏ដូចជាបញ្ជារបស់បញ្ជាការដ្ឋានយោភូមិភាគ៤ ដែលបានដាក់ចូលផែនការប្រចាំឆ្នាំទាក់ទងទៅនឹងការហ្វឹកហាត់ជាប្រចាំទៅដល់កងកម្លាំងប្រដាប់អាវុធ។
លោកបន្ថែមទៀតថា នេះជាកិច្ចការដែលមានសារៈសំខាន់ណាស់សម្រាប់កងយុទ្ធពលខេមរភូមិន្ទ ក្នុងការបង្កើននូវសមត្ថភាពជំនាញពិតប្រាកដដល់កម្លាំងសម្រាប់ការពារប្រទេសជាតិបើទោះបីប្រទេសយើងធ្លាប់ឆ្លងកាត់សង្គ្រាម ហើយសព្វថ្ងៃនេះទទួលបានសុខសន្តិភាពក៏ដោយប៉ុន្តែកងទ័ពមិនត្រូវបោះបង់និងភ្លេចខ្លួននោះទេត្រូវតែហ្វឹកហាត់បង្កើនសមត្ថភាព ចំណេះ ជំនាញ និងអង្គអាចក្លាហានជានិច្ច។
លោកបន្តទៀតថាទោះបីយើងមានការហ្វឹកហាត់ជាបន្តបន្ទាប់ក្តីទាក់ទងនឹងសមត្ថភាពនៅមានកម្រិតដោយសារការហ្វឹកហាត់នេះមានរយៈពេលខ្លីត្រឹមតែបីខែប៉ុណ្ណោះ។ ដូចនេះជំនាញនៅក្នុងមេរៀនមានការអនុវត្តជាក់ស្ដែងយើងទទួលបានលទ្ធផលមានកម្រិត ទោះយ៉ាងណាការយល់ដឹងទទួលបានលទ្ធផលល្អ។
លើសពីនេះទៀតលោកសូមកោតសរសើរដល់លោក មេបញ្ជាការតំបន់ប្រតិបត្តិការសឹករងកំពង់ធំក្រៅពីការងារស្នូលនិងការងារជំនាញលោកមេបញ្ជាការបានដឹកនាំកងកម្លាំងធ្វើការងារសង្គមជាច្រើនជាពិសេសការងារមនុស្សធម៌ ផ្សារភ្ជាប់ជាមួយនឹងប្រជាពលរដ្ឋ។
ចុងក្រោយ ឯកឧត្តម.ងួន រតនៈ បាន ថ្លែងអំរគុណចំពោះអាជ្ញាធរដែនដីគ្រប់លំដាប់ថ្នាក់ជុំវិញខេត្តព្រមទាំងសប្បុរសជន នានាដែលបានចំណាយទាំងសម្ភារៈ ថវិកា ដើម្បីចូលរួមចំណែកជាមួយកងយោធពលខេមរភូមិន្ទនិងបានធ្វើឲ្យកងទ័ព មានលទ្ធភាពការពារបូរណភាពទឹកដីជាតិមាតុភូមិនិងប្រជាជន ។
តាមរបាយការណ៍ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំបានបញ្ជាក់ថាលទ្ធផលហ្វឹកហ្វឺនរៀនសូត្ររយៈពេល៨៧ថ្ងៃ កន្លងទៅដោយអនុវត្តតាមផែនការហ្វឹកហ្វឺនរបស់បញ្ជាការដ្ឋានកងទ័ពជើងគោក នៃកងយោធពលខេមរភូមិន្ទនិងបញ្ជាការដ្ឋានយោធភូមិភាគទី៤តាមខ្លឹមសារនិងកម្មវិធីហ្វឹកហ្វឺនដែលបានគ្រោងទុកសិក្ខាកាមចំនួន១០០នាក់ និងក្រុមគ្រូយោធាចារ្យចំនួន១០នាក់ ត្រូវដំណើរការបាញ់ស៊ីបគ្រាប់ពិតប្រភេទអាវុធAK៤៧ ដើម្បីវាស់ស្ទង់ពីកម្រិតយល់ដឹងក្នុងការប្រើប្រាស់បច្ចេកទេសអាវុធស្វ័យប្រវត្តិដែលយោធិនគ្រប់រូបត្រូវចេះស្ទាត់សម្រាប់ការពារខ្លួន និងបាញ់កំទេចគោលដៅខ្មាំងសត្រូវ ក្នុងពេលប្រយុទ្ធនៅលើសមរភូមិ៕
