ព្រះវិហារ៖ យុទ្ធនាការបរិច្ចាកឈាមប្ដូរវេន លើកទី១០ ក្រោមប្រធានបទ ផ្ដល់ឈាម ផ្ដល់ក្ដីស្រលាញ់ ទទួលបានឈាមចំនួន ៧៥ប្លោក ដើម្បីរួមចំណែកក្នុងការបំពេញតម្រូវការឈាម ទៅដល់មន្ទីរ ពេទ្យបង្អែក១៦មករា ដែលបាននិងកំពុងមានបញ្ហាប្រឈមកង្វះឈាម ដើម្បីជួយសង្រ្គោះដល់ ជនរងគ្រោះ និងអ្នកជំងឺដែលត្រូវការឈាមចាំបាច់ជារៀងរាល់ថ្ងៃ។
យុទ្ធនាការបរិច្ចាកឈាមប្ដូរវេន លើកទី១០នេះ បានប្រព្រឹត្តិធ្វើឡើងនៅព្រឹកថ្ងៃទី០៩ ខែកញ្ញា ឆ្នាំ២០២៣ នៅទីបញ្ជាការតំបន់ប្រតិបត្តិការសឹករងព្រះវិហារ យោធភូមិភាគទី៤
ក្រោមអធិបតីភាព ឯកឧត្តម គីម រិទ្ធី អភិបាល នៃគណៈអភិបាលខេត្តព្រះវិហារ និងមានការទទួលស្វាគមពីសំណាក់ ឯកឧត្ដម ឧត្តមសេនីយ៍ទោ ច័ន្ទ សុភ័ក្រ្ដា មេបញ្ជាការតំបន់ប្រតិបត្តិការសឹករងព្រះវិហារ និងមានការចូលរួម លោក លោកស្រី ជាអភិបាលរងខេត្ត ថ្នាក់ដឹកនាំមន្ទីរអង្គភាពជុំវិញខេត្ត ព្រមទាំងនាយទាហាន នាយទាហានរង និងពលទាហានចូលរួមយ៉ាងច្រើនរូបទៀត។
ថ្លែងក្នុងឱកាសនោះ ឯកឧត្ដម គីម រិទ្ធី បានសម្តែងនូវក្តីរីករាយសប្បាយរីករាយ និងថ្លែង អំណរគុណចំពោះវត្តមាន នាយទាហាន នាយទាហានរង និងពលទាហានទាំងអស់ ដែលបាន ចូលរួមដោយស្ម័គ្រចិត្ត ក្នុងការបរិច្ចាគឈាមនាពេលនេះ ដែលជាផ្នែកមួយនៃការលើកកម្ពស់ វិស័យមនុស្សធម៌ ក្រោមពាក្យស្លោក ផ្តល់ឈាម គឺផ្តល់ក្តីស្រលាញ់។
ឯកឧត្តមបន្តទៀតថា ការផ្តល់ឈាមដោយស្ម័គ្រចិត្តជាប្រភពឈាមតែមួយគត់ ដែលអាចផ្តល់ឈាម ប្រកបដោយ ចីរភាព ដើម្បីផ្គត់ផ្គង់ដល់មន្ទីរពេទ្យខេត្តព្រះវិហារយើង ក្នុងការយកទៅជួយសង្គ្រោះអាយុជីវិត ជនរងគ្រោះទូទៅ ដែលបណ្តាលមកពីកត្តាផ្សេងៗជាច្រើន ដែលពួកគាត់មានតម្រូវការឈាម។
កន្លងមកមន្ទីរពេទ្យខេត្តព្រះវិហារ មានតម្រូវការឈាមតែជាង ៥០ប្លោកប៉ុណ្ណោះ ប៉ុន្ដែបច្ចុប្បន្នមានតម្រូវការឈាមកើនឡើងរហូតដល់ទៅ ១០០ប្លោកក្នុងមួយខែ ដែល កត្តានេះ គឺដោយសារតែយើងមានឈាមច្រើនសម្រាប់សង្គ្រោះអ្នកជំងឺ ដែលបានមកពីការចូល រួមបរិច្ចាកឈាម ពីសំណាក់បងប្អូនប្រជាពលរដ្ឋ មន្ដ្រីរាជការ ព្រះសង្ឃ កងកម្លាំងប្រដាប់អាវុធ តាមរយៈ «យុទ្ធនាការផ្ដល់ឈាមប្ដូរវេន» តាមបណ្ដាក្រុង-ស្រុក ក្នុងខេត្តជាបន្ដបន្ទាប់ ហើយ អ្នកជំងឺភាគច្រើន គឺយើងពុំបានបានបញ្ជូនទៅសង្គ្រោះបន្ដនៅឯខេត្តសៀមរាប និងខេត្តកំពង់ធំ ដូចកាលមុននោះឡើយ៕SKS
