ព្រះវិហារ៖ ខេត្តព្រះវិហារដែលជាខេត្តមួយស្ថិតនៅភាគខាងជើងនៃប្រទេសកម្ពុជា បានកំពុងតែដាក់ផែនការជំរុញទាក់ទាញភ្ញៀវទេសចរដោយផ្អែកនៅលើមូលដ្ឋាននិងសក្តានុពលដែលមាន និងពង្រឹងសេវាកម្មដែលខ្វះខាត ។
លោក ប្រធានមន្ទីរទេសចរណ៍ខេត្តព្រះវិហារ គង់ វិបុល បានបញ្ជាក់ កាលពីពេលថ្មីៗនេះថា ខេត្តព្រះវិហារមានរមណីដ្ឋានទេសចរណ៍ទាំងប្រវត្តិសាស្រ្ត វប្បធម៌ និង ធនធានធម្មជាតិសរុបចំនួន ២៧ កន្លែង ដោយនៅក្នុងនោះ គឺរួមមាន ប្រាសាទព្រះវិហារដែលជាសម្បត្តិបេតិកភណ្ឌពិភពលោក ប្រាសាទកោះកេរ ជាអតីតទីតាំងរាជធានីខ្មែរបុរាណ និង ប្រាសាទព្រះខ័នកំពង់ស្វាយ ឬ ប្រាសាទបាកាន រមណីដ្ឋានបែបធម្មជាតិ២ និង គោលដៅសហគមន៍ទេសចរណ៍ប្រមាណជា ១០ កន្លែង ។
លោកថា ខេត្តព្រះវិហារយើងមានទាំងធនធានវប្បធម៌ ធម្មជាតិ និង ប្រវត្តិ សាស្រ្ត ប៉ុន្តែយើងក៏ត្រូវការវិនិយោគបន្ថែមលើសេវាកម្មមួយចំនួន ជាពិសេសគឺ លើ សេវាកម្មស្នាក់នៅ ការហូបចុក និង សេវាកម្មកំសាន្តផ្សេងៗ ។
លោកបានបន្ថែមថា មកដល់ពេលនេះ យើងមានសណ្ឋាគារនិងមូតែលចំនួន ៥ កន្លែង ផ្ទះភ្ញៀវ ៤១ កន្លែង ពោលគឺ ប្រមាណជា ជាង ៦០០ បន្ទប់ និង ភោជនីយដ្ឋាន ៤៣ កន្លែង ប៉ុណ្ណោះ ។
ហើយនៅមិនទាន់បំពេញសេចក្តីត្រូវការសម្រាប់ទាក់ទាញភ្ញៀវទេសចរគ្រប់គ្រាន់នៅឡើយទេ ប៉ុន្តែយើងនឹងខិតខំបំពេញបន្ថែម តាមផែនការនិងយុទ្ធសាស្រ្តដែលយើងបានរៀបចំទុក ផងដែរ“ ។
លោកបានបន្តទៀតថា តាមផែនការបច្ចុប្បន្នកម្មអភិវឌ្ឈន៍ទេសចរណ៍ ២០២១ ដល់ ២០២៥ យើងមានបំណងទាក់ទាញភ្ញៀវទេសចរជាតិនិងអន្តរជាតិឲ្យបាន១ លាននាក់ ដោយនៅពេលនេះយើងកំពុងអនុវត្តនូវយុទ្ធសាស្រ្តមួយចំនួន ដូចជាៈ ការអភិវឌ្ឈន៍ផលិតផលទេសចរណ៍, ជំរុញការផ្សព្វផ្សាយទេសចរណ៍, ជំរុញការអភិវឌ្ឈន៍ហេដ្ឋារចនាសម្ព័ន្ធ, បន្តពង្រឹងសន្តិសុខសុវត្ថិភាពជូនអ្នកទេសចរ, ពង្រឹងការអនុវត្តច្បាប់ពាក់ព័ន្ធនឹងការគ្រប់គ្រងនិងការវិនិយោគលើវិស័យទេសចរណ៌, ការអភិវឌ្ឈន៍ធនធានមនុស្ស, ជំរុញការវិនិយោគលើវិស័យទេសចរណ៍ និង ពង្រឹងការអភិរក្សនិងគ្រប់គ្រងធនធនធម្មជាតិជាដើម ។
លោកបានបញ្ជាក់ថា “ នៅឆ្នាំ២០២៣ នេះ យើងរំពឹងថា ភ្ញៀវទេសចរនឹងអាចកើនឡើង ទាបបំផុតជាង ៤០ ភាគរយ បន្ថែមទៀតធៀបនឹងឆ្នាំ២០២២កន្លងមក ហើយដើម្បីសម្រេចផែនការនេះខេត្តគ្រោងនឹងរៀបចំ ព្រឹត្តិការណ៍ទេសចរណ៍មួយចំនួនដូចជាអុំទូកបែបសហគមន៍ សង្រ្កាន្ត ចូលឆ្នាំតាមក្រុង/ស្រុក មាឃបូជា ក៏ដូចជា ការៀបចំតាំងផលិតផលម្ហូបអាហារខ្មែរជាដើម” ៕
