សៀមរាប ៖ គិតមកទល់ពេលនេះ ប្រជាពលរដ្ឋប្រមាណ៥ពាន់នាក់ ត្រូវអាជា្ញធរប្រាប់ថា បានចាកចេញពីចម្ការម្រេច លោក ខឹម វាសនា ប្រធានគណបក្ស សម្ព័ន្ធដើម្បីប្រជាធិបតេយ្យ ហៅកាត់ថា LDP ហើយអ្នកនៅសេសសល់ជាង១ម៉ឹននាក់ទៀត អាជា្ញធរទុកពេលឱ្យ៥ថ្ងៃក្នុងការសម្រេចចាកចេញពីទីនោះ ។
លោក ឃឹម ហ្វីណង់ អភិបាលស្រុកបន្ទាយស្រី ខេត្ដសៀមរាប បានមានប្រសាសន៍នៅថ្ងៃទី១ខែកញ្ញានេះថា ក្នុងមួយថ្ងៃៗមានប្រជាពលរដ្ឋជាង១ពាន់នាក់ បានចាកចេញទៅលំនៅឋានរបស់ពួកគាត់ ខ្លះចេញជាលក្ខណៈគ្រួសារ បន្ទាប់ពីមានការចូលមកប្រមូលផ្ដុំគ្នានៅចម្ការម្រេចរបស់លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ខណៈអាជ្ញាធរបានកំណត់ឱ្យត្រឡប់ទៅលំនៅឋានវិញឱ្យអស់ក្នុងរយៈពេល៥ថ្ងៃទៀត។
លោកបានបន្ដថា ក្រោយពីមានកិច្ចសន្យាបញ្ចប់ការជួលដីជាមួយម្ចាស់ដី ដែលជាសមាជិកគណបក្ស និងតំណាងលោក ខឹម វាសនា រួមមក ប្រជាពលរដ្ឋដែលប្រមូលជុំគ្នានោះ ពួកគាត់បានចាកចេញជាបន្ដបន្ទាប់ ដែលអាចប៉ាន់ប្រមាណប្រហែល៥ពាន់នាក់ បើគិតចាប់ពីថ្ងៃទី៣០ខែសីហា ដល់ថ្ងៃទី០១ខែកញ្ញាឆ្នាំ២០២២នេះ ហើយការចាកចេញនេះ ភាគច្រើនជាមនុស្សចាស់ និងកូនក្មេង ដែលពួកគាត់បានមកស្នាក់នៅយូរថ្ងៃ បណ្ដាលធ្វើឱ្យប៉ះពាល់ដល់សុខភាពពួកគាត់ ព្រោះមុខមាត់គាត់មានសភាពស្លេកស្លាំងហើយអាចមានផ្ទុកជំងឺផ្សេងៗផងដែរ ព្រោះនៅបរិវេណនៃការស្នាក់នៅរបស់ពួកគាត់ បរិស្ថានមិនបានល្អ ខ្វះអនាម័យ។
លោកបន្ដថា ក្រោយពីកំណត់រយៈពេល៥ថ្ងៃ ប្រជាពលរដ្ឋនៅតែបន្ដប្រមូលផ្ដុំទៀតនោះ អាជ្ញាធរនឹងមានវិធានបន្ថែមទៀត ដោយមានការផ្ដាច់ការចំអិនម្ហូបឱ្យអ្នកប្រមូលផ្ដុំ ផ្ដាច់ការទំនាក់ទំនងតាមវិទ្យុទាក់ទង ហើយនឹងឱ្យរុះរើរោងដោយខ្លួនឯង ព្រោះម្ចាស់ដីឈ្មោះ នី ចាន់ពិនិត្យ ជាសមាជិកគណបក្សអិលឌីភីផង និងជាម្ចាស់ដីជួលផង បានយល់ព្រមផ្ដិតមេដៃបញ្ជប់ការជួលឱ្យការប្រមូលផ្ដុំគ្នាដោយខុសច្បាប់នេះ។
លោកថា អាជ្ញាធរបានត្រៀមរថយន្ដជាច្រើនគ្រឿង រួមមានរថយន្ដសាលាខេត្ដសៀមរាប រថយន្ដយោធាយោធភូមិភាគទី៤ និងយោធាកងពលធំអន្ដរាគមន៍លេខ២ សម្រាប់ដឹកអ្នកដែលចង់ជិះ និងគ្មានលទ្ធភាពជិះរថយន្ដឈ្នួល ឬមធ្យោបាយឈ្នួលផ្សេងៗត្រឡប់ទៅផ្ទះវិញ។
សូមបញ្ជាក់ថា ចាប់ពីថ្ងៃទី២៣ ខែសីហា ឆ្នាំ២០២២មក លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានសរសេរនៅលើបណ្ដាញសង្គម ហ្វេសប៊ុករបស់ខ្លួនថា តាមការធ្វើវិបស្សនារបស់លោកឃើញថា ភពផែនដីនឹងត្រូវជន់លិចនៅពេលខាងមុខ ហើយលោកអំពាវនាវឲ្យអ្នកដែលគាំទ្រទៅជួបជុំគ្នានៅលើដីចំការរបស់លោក ឯជើងភ្នំគូលែននៃខេត្តសៀមរាប ទើបអាចរួចផុតពីគ្រោះមហន្តរាយនេះ។ បន្ទាប់ពីការសរសេរលើបណ្ដាញសង្គមរបស់មេបក្សរូបនោះមក ក៏មានពលរដ្ឋចូលរួមក្នុងចន្លោះពី១ម៉ឹន ៥ពាន់ ទៅ១ម៉ឹន ៧ពាន់ បាននាំក្រុមគ្រួសារ ធ្វើដំណើរខ្លះ តាមរថយន្ត ខ្លះតាមម៉ូតូ ទៅកាន់តំបន់ជើងភ្នំគូលែន។ ចំណែកពលករខ្មែរខ្លះ ដែលកំពុងធ្វើការនៅក្រៅប្រទេសក៏ប្រញាប់ប្រញាល់វិលត្រឡប់មកកម្ពុជា ដោយបោះបង់ការងាររបស់ខ្លួនដែរ។
នៅថ្ងៃទី២៩ ខែសីហាឆ្នាំ២០២២ អភិបាលខេត្តសៀមរាប លោក ទៀ សីហា បានសរសេរលិខិតមួយផ្ញើជូន លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ដោយសុំឱ្យបញ្ឈប់ការប្រមូលផ្តុំ និងរំសាយការជួបជុំ ចាប់ពីថ្ងៃទី៣០ ខែសីហា ឆ្នាំ២០២២ វេលាម៉ោង ២៤៖០០នាទីយប់ និងរាល់សំណង់ដែលបានសាងសង់ត្រូវដាក់ពាក្យស្នើសុំអនុញ្ញាតពីអាជ្ញាធរ៕
