ខេត្តប៉ៃលិន ៖ នៅព្រឹកថ្ងៃទី៣១ ខែសីហា ឆ្នាំ២០២២ នៅក្នុងសាលប្រជុំសាលាខេត្តប៉ៃលិន លោកជំទាវ បាន ស្រីមុំ អភិបាលខេត្ត និងជាប្រធានគណៈបញ្ជាការឯកភាពខេត្តប៉ៃលិន បានអញ្ជើញដឹកនាំកិច្ចប្រជុំក្រុមការងារគណៈបញ្ជាការឯកភាពរដ្ឋបាលខេត្ត ដើម្បីត្រៀមរៀបចំសន្តិសុខសណ្តាប់ធ្នាប់សាធារណ: នាឱកាសពិធីបុណ្យកាន់បិណ្ឌ និងភ្ជុំបិណ្ឌ ដែលចូលមកដល់នាថ្ងៃខាងមុខឆាប់ៗនេះ។
នៅក្នុងកិច្ចប្រជុំនេះដែរលោកជំទាវអភិបាលខេត្តប៉ៃលិន ក៍បានដាក់ផែនការនៅតាមគោលដៅនីមួយៗ ដោយបានដាក់កម្លាំងយាមកាមជាប្រចាំ ក្នុងការចូលរួមបង្រ្កាប និងទប់ស្កាត់ករណីក្មេងទំនើងដែលបង្កការអុកឡុកដល់ភូមិឃុំសុវត្ថិភាព ប្រជាពលរដ្ឋ ខណ:ពេលទៅធ្វើបុណ្យទាននៅតាមវត្តអារាមនានាទូទាំងខេត្ត។ ប្រភពបន្តទៀតថា នៅតាមគោលដៅទាំងអស់ ត្រូវឱ្យកម្លាំងសមត្ថកិច្ច បែងចែកឱ្យ បានគ្រប់ច្រកល្ហក បើសិនជាមានការរាយការណ៍ពីអាជ្ញាធរមូលដ្ឋាន ឬប្រជាការពារភូមិ ត្រូវប្រញាប់ទៅ ដល់គោលដៅឱ្យបានឆាប់រហ័សបំផុត។
ក្នុងនោះដែរ លោកជំទាវអភិបាលខេត្ត ក៍បានជម្រុញឲ្យអាជ្ញាធរក្រុង/ស្រុក កងកម្លាំងមានសមត្ថកិច្ចទាំងអស់ ត្រូវអនុវត្តឲ្យបាននូវភូមិ/ឃុំ មានសុវត្ថិភាពទាំង៩ចំណុច ឲ្យមានប្រសិទ្ធភាពខ្ពស់បំផុត ដើម្បីរក្សាសុខមាលភាព និងសុវត្ថិភាពជូនដល់ប្រជាពលរដ្ឋនៅក្នុងមូលដ្ឋាន។
បើពិនិត្យឃើញមានសកម្មភាពណាមួយគួរឱ្យសង្ស័យ ត្រូវតែចុះទៅពិនិត្យឱ្យបានដិតដល់ ដើម្បី ចាត់ការចំពោះក្មេងទំនើង ដែលធ្វើឱ្យប៉ះពាល់ដល់សុវត្ថិភាពសន្តិសុខសង្គម៕ ដោយ ៖ នីយ៉ា
