ខេត្តស្វាយរៀង៖នៅថ្ងៃ អាទិត្យ ទី ២៩ ខែ ឧសភា ឆ្នាំ ២០២២ លោកជំទាវ ដួងវណ្ណា ប្រធានកិត្តិយសសាខា កាកបាទក្រហមកម្ពុជាខេត្តស្វាយរៀង លោកជំទាវ ពៅ សុភាព ហេរញ្ញឹកគណៈកម្មាធិការសាខា និងសហការី បានចុះសួរសុខទុក្ខ និងនាំយកអំណោយមនុស្សធម៌ យកទៅជួយសម្រាលការលំបាក ដល់ប្រជាពលរដ្ឋ រងគ្រោះដោយសារខ្យល់កន្ត្រាក់កាលពីថ្ងៃទី ២៦-២៧ ខែ ឧសភា ឆ្នាំ ២០២២ បណ្ដាលខូចខាត ផ្ទះប្រជាពលរដ្ឋ ចំនួន ២៥ ខ្នង (ធ្ងន់ ៩ ខ្នង មធ្យម ១១ ខ្នង ស្រាល ៥ ខ្នង ) និង របួសមនុស្ស ១ នាក់ ក្នុងស្រុកកំពង់រោទិ៍ នៅឃុំ ថ្មី ញរ ខ្សែត្រ ត្នោត និងឃុំសំឡី ក្នុងស្រុកចន្ទ្រា នៅឃុំមេសរថ្ងក ។
នាឱកាសនោះលោកជំទាវ ដួង វណ្ណា បាននាំមកនូវប្រសាសន៍ផ្តាំផ្ញើរ សាកសួរសុខទុក្ខពីសំណាក់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម កម្ពុជា ដែលជានិច្ចកាលសម្តេចតែងតែយកចិត្តទុកដាក់គិតគូរពីសុខមាលភាពប្រជាពលរដ្ឋទូទៅ ដោយមិនប្រកាន់និន្នាការនយោបាយអ្វីឡើយ ។ ជាមួយគ្នានេះ លោកជំទាវ បានលើកទឹកចិត្តសូមកុំអស់សង្ឃឹម ហើយប្រឹងប្រែងបំពេញការងារ និងប្រកបរបរចិញ្ចឹមជីវិត ដើម្បីស្តារសេដ្ឋកិច្ចគ្រួសារឡើងវិញ ។ លោកជំទាវ ដួង វណ្ណា ក៍បានលើកឡើងពីការខិតខំប្រឹងប្រែង របស់កាកបាទក្រហមកម្ពុជា ក្នុងការជួយដល់ប្រជាពលរដ្ឋនៅពេលជួបគ្រោះមហន្តរាយផ្សេងៗ ពោលគឺទីណាមានការលំបាកទីនោះមានវត្តមានកាកបាទក្រហមកម្ពុជាចុះជួយជានិច្ច ។ ទន្ទឹមនេះសូមអំពាវនាវ ដល់ប្រជាជនទាំងអស់ត្រូវមានការប្រុងប្រយ័ត្ននៅពេលមានភ្លៀង និងខ្យល់បក់បោកខ្លាំង ត្រូវរក កន្លែងដែលមានសុវត្ថិភាព ជៀសវាងមានគ្រោះថ្នាក់ជាយថាហេតុ ត្រូវគិតគូរពីសុខភាព មានអនាម័យល្អក្នុងការរស់នៅដោយប្រកាន់ភ្ជាប់នូវការហូបស្អាត សម្អាតបរិស្ថានជុំវិញផ្ទះ បំផ្លាញ ជម្រកមូសខ្លា សម្រានក្នុងមុងដើម្បីការពារកើតជម្ងឺគ្រុនឈាម ។
អំណោយចែកជូន ក្នុង ១ គ្រួសារ ទទួលបាន៖ អង្ករ ៣០ គ.ក្រ មី ១ កេស ត្រីខកំប៉ុង ១០ កំប៉ុង ទឹកស៊ីអ៊ីវ ៦ ដប កន្ទេលជ័របត់ ១ ឃីត ១ កញ្ចប់ (ភួយ,មុង,សារុង,ក្រមា) ថវិកា ៥ ម៉ឺនរៀល ដោយឡែកគ្រួសាររងគ្រោះធ្ងន់ ទទួលបានសម្ភារបន្ថែមរួមមាន៖ ក្រណាត់កៅស៊ូតង់ ១ ធុងទឹកជ័រ ១ ឆ្នាំងបាយ-សម្លរ ២ និងថវិកា ២០ ម៉ឺនរៀល ។ ឧបត្ថម្ភអ្នករបួសថវិកា ២០ ម៉ឺនរៀល សម្រាប់គ្រួសាររងគ្រោះស្រាលក្នុង ១ គ្រួសារទទួលបានថវិកា ៦ ម៉ឹនរៀលសម្រាប់ទិញសម្ភារជួសជុលផ្ទះឡើងវិញ ។
