ព្រះវិហារៈ រថយន្ដរបស់តារាចម្រៀង សុវត្ថិឌី ធារិកា ជួបគ្រោះថ្នាក់ចរាចរណ៍ក្រឡាប់ដោយខ្លួនឯង បណ្ដាលឲ្យស្លាប់ឪពុក និងម្ដាយ នៅរសៀលថ្ងៃទី១៧ ខែឧសភា ឆ្នាំ២០២២នេះ ក្រោយត្រឡប់មកពីចូលរួមកម្មវិធីសម្ពោធ និងសំណង់សិល្បការផ្សេងៗ នៅស្រុកឆែប ខេត្តព្រះវិហារ ក្រោមអធិបតីភាពសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។
លោកឧត្តមសេនីយ៍ទោ សួស សុខដារ៉ា ស្នងការនគរបាលខេត្តព្រះវិហារ បានបញ្ជាក់ ឲ្យដឹង ថា ក្នុងហេតុការណ៍គ្រោះថ្នាក់ចរាចរណ៍នេះ បណ្ដាលឲ្យមនុស្ស២នាក់ស្លាប់ ហើយត្រូវបានគេស្គាល់ថា ជាឪពុក និងម្ដាយបង្កើត របស់តារាចម្រៀង សុវត្ថិឌី ធារិកា ព្រមទាំងរបួស២នាក់ទៀតផងដែរ។
ក្រោយកើតហេតុភ្លាមៗកម្លាំងនគរបាលមូលដ្ឋាន បានចុះទៅជួយអន្តរាគមន៍ផងដែរ ប៉ុន្តែជាអកុសលជួយមិនទាន់ដោយសារជនរងគ្រោះ ក្រឡាប់ចូលប្រឡាយទឹកនៅជាប់ផ្លូវបណ្តាល ឲ្យឈ្លក់ស្លាប់តែម្តង។
បន្ថែមពីនេះលោកវរសេនីយ៍ឯក ឈួរ ម៉ាឌី អធិការនគរបាលស្រុកឆែប បានបញ្ជាក់ថា ហេតុការណ៍នេះ គឺរថយន្ដក្រឡាប់ធ្លាក់ទឹកដោយខ្លួនឯង ហើយជនរងគ្រោះដែលស្លាប់ទំនងជាឈ្លក់ទឹក ដែលមិនអាចសង្គ្រោះបានទាន់ពេលវេលា។
ជាមួយគ្នានេះ ទាំងលោកឧត្តមសេនីយ៍ស្នងការ និងលោកអធិការស្រុក សូមចូលរួមរំលែកទុក្ខជាមួយក្រុមគ្រួសាររងគ្រោះផងដែរ សម្រាប់ជួបគ្រោះអកុសលនេះ។
ដោយឡែកតារាចម្រៀង អ៊ាម វណ្ណី ក៏បានថ្លែងថា ឪពុកនិងម្តាយរបស់សុវត្ថិឌី ធារិកា បានបាត់បង់ជីវិតទាំងពីរអ្នកហើយ ក្នុងគ្រោះថ្នាក់ចរាចរ នៅស្រុកឆែប ខេត្តព្រះវិហារ ធារិកា ប្អូនប្រុស និងយាយផុតគ្រោះថ្នាក់ ហើយលោកពិតជាសោកស្តាយយ៉ាងខ្លាំង ចំពោះការបាត់បងនេះ។
សូមបញ្ជាក់ផងដែរថាករណីគ្រោះថ្នាក់ ចរាចរណ៍ នេះ គឺ បន្ទាប់ពី ក្រុមគ្រួសារតារាចម្រៀង សុវត្ថិ ឌីធារិកា បានវិលត្រឡប់ មកពី ចូលរួមកម្មវិធី មួយ នៅ ឃុំ កំពង់ ស្រឡៅ មួយ ស្រុក ឆែប ខេត្តព្រះវិហារនាព្រឹកមិញនេះ៕
