ប្រកាសចូលកាន់មុខតំណែងថ្មី អភិបាលនៃគណៈអភិបាលស្រុកសណ្តាន់ និងស្រុកសន្ទុក

ដោយៈ ឈិត សំបូរ

កំពង់ធំ: នៅថ្ងៃទី១៨ ខែសីហា ឆ្នាំ២០២១ ឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តកំពង់ធំ ជាអធិបតីក្នុងពិធីប្រកាសចូលកាន់មុខតំណែងថ្មីលោក អ៊ិត វណ្ណរ៉ា-ជាអភិបាលនៃគណៈអភិបាលស្រុកសណ្តាន់ លោក ឡង គីសឹង ជាអភិបាលនៃគណៈអភិបាលស្រុកសន្ទុកនិងលោក ស្រី ឡាក់ សៅចាន់ ជាអភិបាលរងស្រុកសណ្តាន់។

ឆ្លៀតក្នុងឱកាសនោះ ឯកឧត្តម សុខ លូ អភិបាលខេត្តកំពង់ធំ មានប្រសាសន៍លើកឡើងថា ការផ្លាស់ប្ដូរមុខតំណែងតួនាទីនេះគឺជារឿងធម្មតារបស់មន្ត្រីរាជការ ព្រោះមុខតំណែងនេះមិនមែនជាកម្មសិទ្ធិរបស់បុគ្គលណាម្នាក់នោះទេ ។

ជាមួយគ្នានោះឯកឧត្តម សុខ លូ បានក្រើនរំលឹកលោកអភិបាលស្រុកដែលទើបនឹងទទួលមុខតំណែងថ្មីនេះ សូមគោរពនូវតួនាទី និងភារកិច្ចរបស់ខ្លួនឲ្យបានខ្ជាប់ខ្ជួន ត្រូវបង្កើនសាមគ្គីភាព ឯកភាពផ្ទៃក្នុង បង្កើនការទំនាក់ទំនង និងកិច្ចសហការល្អ ជាមួយគណៈអភិបាលស្រុក ក៏ដូចជាក្រុមប្រឹក្សាស្រុក មន្ត្រីរាជការក្រោមឱវាទ និងមន្ទីរអង្គភាពជុំវិញស្រុក ដើម្បីបន្តដឹកនាំការងារនិរន្តរភាពរដ្ឋបាលស្រុកបន្តទៀត ជាពិសេសត្រូវចុះពិនិត្យមើលការងារមូលដ្ឋាន តាមបណ្ដាឃុំសង្កាត់ទាំងអស់នៅក្នុងដែនសមត្ថកិច្ចរបស់ខ្លួនឲ្យបានញឹកញាប់ និងពិនិត្យមើលការបម្រើសេវាសាធារណៈនៅអង្គភាពច្រកចេញចូលតែមួយ ធ្វើយ៉ាងណាឲ្យការបំរើសេវាសាធារណៈជូនប្រជាពលរដ្ឋនេះ ប្រព្រឹត្តទៅបានរលូន ឆាប់រហ័ស ទាន់ពេលវេលា មានតម្លាភាព និងប្រកបដោយប្រសិទ្ធភាព។

លើសពីនេះទៀតឯកឧត្តមបន្ថែមទៀតថា លោកអភិបាលស្រុកក្នុងនាមគណៈបញ្ជាការឯកភាពរដ្ឋបាលស្រុក ត្រូវតែពិនិត្យកងកំលាំងទាំងបី ធ្វើយ៉ាងណា ត្រូវរក្សាសណ្ដាប់ធ្នាប់សាធារណៈ និងសុខសុវត្ថិភាពជូនប្រជាពលរដ្ឋឲ្យបានល្អប្រសើរ ជាពិសេស ត្រូវបំរើបងប្អូនប្រជាពលរដ្ឋ ដោយការពារប្រយោជន៍ស្របច្បាប់របស់ប្រជាពលរដ្ឋ មិនមែនការពារប្រយោជន៍មិនស្របច្បាប់របស់ជនខិលខូចមួយចំនួននោះទេ ហើយយើងរួមគ្នាការពារ និងអភិរក្សធនធានធម្មជាតិ តំបន់សត្វខ្សិប តំបន់ព្រៃលិចទឹក និងចូលរួមទប់ស្កាត់បង្ក្រាបនូវបទល្មើសនានាដែលតែងតែកើតមានឡើងនៅក្នុងដែនសមត្ថកិច្ចរបស់ខ្លួន។ ហើយក្រៅពីការងារស្នូលសូមថ្នាក់ដឹកនាំទាំងអស់ត្រូវបន្តចុះទៅតាមមូលដ្ឋាន ដើម្បីជួបប្រជាពលរដ្ឋក្នុងការដោះស្រាយនូវបញ្ហានិងសំណូមពរជូនពួកគាត់ឲ្យបានទាន់ពេលវេលា។

ជាមួយគ្នានោះដែរ ឯកឧត្តម សុខ លូ អភិបាលខេត្តកំពង់ធំ បានអំពាវនាវដល់មន្ត្រីរាជការ និងកងកម្លាំងប្រដាប់អាវុធសូមអញ្ជើញទៅចូលរួមចាក់វ៉ាក់សាំង ដូសទី៣(ដូសជំរុញ)នេះ ទៅតាមការជូនដំណឹងរបស់រដ្ឋបាលខេត្ត ក្នុងនោះឯកឧត្តមបានបញ្ជាក់ថា ការចាក់វ៉ាក់សាំង ដូសទី៣(ដូសជំរុញ)នេះ គឺសម្រាប់តែ មន្ត្រីសុខាភិបាល កងកម្លាំងប្រដាប់អាវុធ មន្ត្រីរាជការស៊ីវិល មន្ត្រីជាប់កិច្ចសន្យា និងអាជ្ញាធរគ្រប់លំដាប់ថ្នាក់ តែប៉ុណ្ណោះ ដោយឡែកការចាក់វ៉ាក់សាំងសម្រាប់ប្រជាពលរដ្ឋទូទៅ នឹងត្រូវធ្វើឡើងនៅពេលក្រោយ ព្រមទាំងអំពាវនាវបន្ថែមទៀតដល់មាតាបិតា និងអាណាព្យាបាលនៅតាមបណ្តាក្រុង ស្រុកទាំងអស់នៃខេត្តកំពង់ធំ នាំកូនចៅដែលមានអាយុចាប់ពី១២ ទៅ១៧ឆ្នាំ ទៅចាក់វ៉ាក់សាំងការពារជំងឺកូវីដ១៩ អោយបានគ្រប់ៗគ្នាតាមទីកន្លែង និងពេលវេលាដែលបានកំណត់។

ទន្ទឹមនឹងនោះដែរឯកឧត្តម សុខ លូ អភិបាលខេត្តកំពង់ធំក៏ដូចជាប្រជាពលរដ្ឋនៅក្នុងខេត្តកំពង់ធំទាំងមូល សូមថ្លែងអំណរគុណដល់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់ឱកាសដល់ប្រជាពលរដ្ឋទូទាំងប្រទេស ក៏ដូចជាប្រជាពលរដ្ឋនៅក្នុងខេត្តកំពង់ធំ ព្រមទាំងកុមារ និងយុវវ័យដែលមាន អាយុចាប់ពី១២ឆ្នាំ ដល់១៧ឆ្នាំ ទទួលបានការចាក់វ៉ាក់សាំងការពារជំងឺកូវីដ១៩នេះ គ្រប់ៗគ្នា។

You might like

Leave a Reply

Your email address will not be published. Required fields are marked *