កំពង់ចាម : ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម អមដំណើរដោយ អភិបាលរងខេត្ត ថ្នាក់ដឹកនាំមន្ទីរ អង្គភាព ពាក់ព័ន្ធ និងអាជ្ញាធរមូលដ្ឋាន នាព្រឹក ថ្ងៃទី ៧ ខែមិថុនា ឆ្នាំ ២០២១ បានអញ្ជើញចុះពិនិត្យគម្រោងពង្រីកទីលានចាក់សំរាមថ្មីមួយកន្លែង ដែលមានទំហំ ប្រមាណជា៥០ហិកតា ស្ថិតនៅក្នុងភូមិខ្នារ ឃុំស្ដើងជ័យ ស្រុកជើងព្រៃ សំដៅលើកកម្ពស់សុខភាព និងសុខុមាលភាពរបស់ប្រជាពលរដ្ឋ ។
លោក នួន គង់សល្យ ប្រធានមន្ទីរបរិស្ថានខេត្ត កំពង់ចាម បាន ឲ្យដឹងថា ចំពោះ គម្រោង ពង្រីក ទីលាន ចាក់ សំរាម ដែលអាជ្ញាធរខេត្តរួមជាមួយនឹងជំនាញបរិស្ថាន ចុះពិនិត្យដោយផ្ទាល់នេះ បច្ចុប្បន្ន ទីតាំង នេះមានដីទំហំ ប្រមាណជា ៥០ហិកតា ស្ថិតនៅក្រោមការគ្រប់គ្រងរបស់ក្រសួងកសិកម្មរុក្ខាប្រមាញ់ និងនេសាទ។ ក្នុងនោះបានពិនិត្យមើលតាមផែនទី ព្រមទាំងចុះដល់កន្លែងដោយផ្ទាល់ ធ្វើយ៉ាងណាមិនឲ្យមានផលប៉ះពាល់ទៅដល់អ្នកដទៃ។ ដោយទីនេះក៏ធ្លាប់ត្រូវបានមន្ត្រីជំនាញក្រសួងបរិស្ថានបានធ្វើការវាយតម្លៃដោយសមស្របគឺនឹងអាចប្រែក្លាយជាទីលានចាក់សំរាមបាន។
លោកប្រធានមន្ទីរបរិស្ថាន បានឲ្យដឹងទៀតថា ឯកឧត្តម អ៊ុន ចាន់ដា អភិបាលខេត្តកំពង់ចាម នឹងធ្វើការស្នើសុំលាយលក្ខណ៍អក្សរទៅក្រសួងកសិកម្មរុក្ខាប្រមាញ់និងនេសាទ ដើម្បី បង្វែរ ដី នៅ តំបន់ នោះ ឲ្យ ស្ថិតនៅក្រោមការគ្រប់គ្រងរបស់រដ្ឋបាលខេត្តកំពង់ចាមវិញ ជាមួយនោះក៏មានការស្នើសុំទៅប្រមុខរាជរដ្ឋាភិបាលកម្ពុជាផងដែរ។
លោក ប្រធាន មន្ទីរ បរិស្ថាន បាន បញ្ជាក់ ថា នាពេលខាងមុខសម្រាប់ស្រុកជើងព្រៃ ស្រុកបាធាយ និងស្រុកព្រៃឈរ គឺចាក់សំរាមនៅតំបន់នេះ ដែល នៅជិត ងាយស្រួលមិន ចាំបាច់ទៅឆ្ងាយ។ បច្ចុប្បន្ន មានទីលានចាក់សំរាមមួយកន្លែងនៅក្នុងឃុំបុសខ្នុរ ស្រុកចំការលើ ដែលមានទំហំ១០ ហិកតា ត្រូវបានក្រុមហ៊ុនប្រមូលសំរាមនៅក្នុងក្រុងកំពង់ចាម ហើយយកទៅចាក់ចោលនៅតំបន់នោះ ដោយទីលាននោះស្ថិតនៅឆ្ងាយពីភូមិរបស់ប្រជាពលរដ្ឋ និងមិនមានក្លិនស្អុយជះទៅដល់អ្នកភូមិនោះឡេីយ ។ 
គួររំលឹក ថា កន្លងមកឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានឧបត្ថម្ភផ្ដល់ម៉ូតូ និងរថយន្តដឹកសំរាម ជូនដល់រដ្ឋបាលខេត្តកំពង់ចាមជាច្រើនគ្រឿង ដោយបានបែងចែក ជូនតាមបណ្ដាក្រុង ស្រុកមួយចំនួន ដេីម្បី ប្រើប្រាស់ក្នុងយុទ្ធនាការប្រមូលសំរាមឲ្យបានស្អាត និងមានបរិស្ថានល្អ ៕
