ខេត្តកណ្រាលៈនៅថ្ងៃទី២២ខែមេសាឆ្នាំ២០២២ឯកឧត្តមគង់សោភ័ណ្ឌអភិបាលខេត្តកណ្តាលបានអញ្ចើញមកស្រុកកៀនស្វាយ ក្រោយពីទទួលព័ត៌មានដ៏គួរឲ្យព្រួយបារម្ភថាប្រជាពលរដ្ឋ និងអាជីវករលក់ដូរនៅផ្សារគគីរ ស្រុកកៀនស្វាយមួយចំនួនទៀត បានឆ្លងវីរុសកូវីដ-១៩ ពាក់ព័ន្ធព្រឹត្តិការណ៍សហគមន៍ ២០ កុម្ភៈ ជាបន្តបន្ទាប់។ ឯកឧត្តមគង់ សោភ័ណ្ឌបានអញ្ចើញ ចុះពិនិត្យស្ថានភាព នៃការផ្ទុះឡើងនៃវីរុសកូវីដ-១៩ ដោយធ្វើការប្រជុំភ្លាមៗ ជាមួយអាជ្ញាធរស្រុក នៅផ្សារកៀនស្វាយផ្លាហ្សា ដើម្បីដាក់វិធានការបន្ទាន់ភ្លាមឲ្យអាជ្ញាធរបន្តពង្រឹងដោយធ្វើការ ត្រួតពិនិត្យជាប្រចាំ ស្រាវជ្រាវកំណត់មុខសញ្ញាគ្រប់គ្រងអ្នកសង្ស័យពាក់ព័ន្ធ ដោយផ្ទាល់ដោយ ប្រយោល ដើម្បីប្រមូលយកសំណាកធ្វើតេស្តរកមេរោគកូវីដ-១៩ និងដាក់ឱ្យធ្វើចត្តាឡីស័ក តាមវិធានសុខាភិបាល ដោយមានការការពារ យាមកាមឱ្យបានត្រឹមត្រូវម៉ត់ចត់។
ជាការប្រសើរ ដែលប្រជាពលរដ្ឋ និងអាជីវករ ដែលវិជ្ជមានកូវីដ-១៩ ឆ្លងតែក្នុងគ្រួសារតែប៉ុន្នោះ ដោយមិនមានឆ្លងរាលដាលពេញផ្សារគគីនោះទេ ហើយពេលនេះអាជ្ញាធរគ្រប់គ្រងបាន និងបានបិទផ្សារនេះជាបណ្តោះអាសន្ន។ ជាថ្មីម្តងទៀត ខ្ញុំសូមអំពាវនាវដល់បងប្អូនប្រជាពលរដ្ឋ ទាំងអស់ចូលរួមអនុវត្តវិធានការនានារបស់រាជរដ្ឋាភិបាល រដ្ឋបាលខេត្ត រដ្ឋបាលស្រុក ក៏ដូចជាសហការអនុវត្តតាមការណែនាំរបស់អាជ្ញាធរ និងកម្លាំងមានសមត្ថកិច្ច ដើម្បីបុព្វហេតុរួម នៃការកាត់ផ្តាច់ និងឈានទៅបញ្ចប់ការឆ្លងរាលដាលក្នុងសហគមន៍នៃជំងឺកូវីដ-១៩ សំដៅស្ថានការណ៍និងគ្រប់សកម្មភាពរបស់សង្គមវិលមករកប្រក្រតីភាពឡើងវិញក្នុងពេលឆាប់ៗខាងមុខនេះ។ ឆ្លៀតក្នុងឱកាសនេះ ជំនួសមុខឱ្យរដ្ឋបាលខេត្ត ប្រជាពលរដ្ឋ និងក្នុងនាមខ្លួនខ្ញុំផ្ទាល់ ខ្ញុំសូមអរគុណ និងកោតសរសើរ ដល់អាជ្ញាធរគ្រប់លំដាប់ថ្នាក់ របស់ស្រុកកៀនស្វាយ ដែលមានការសហការល្អ រហូតឈានទៅរកការគ្រប់គ្រង អ្នកពាក់ព័ន្ធទាំងអ្នកផ្ទាល់ក្តី និងអ្នកប្រយោលក្តី បានយ៉ាងល្អប្រសើរ ដោយគ្មានការឆ្លងបន្តទៅតំបន់ផ្សេងទៀត និងបន្តផ្សព្វផ្សាយជាប្រចាំដល់ប្រជាពលរដ្ឋបានយល់ដឹង និងអនុវត្តតាមឱ្យបានខ្ជាប់ខ្ជួន តាមវិធានរបស់សុខាភិបាល ជាពិសេស យ័ន្តដ៏ស័ក្តិសិទ្ធរបស់ សម្តេចតេជោ សម្រាប់កំទេចកូវីដ-១៩ គឺ ៣ការពារ ៣កុំ (៣ការពារ ១-ពាក់ម៉ាស់ឲ្យបានត្រឹមត្រូវ ២-ឧស្សាហ៍លាងដៃ ជាមួយសាប៊ូ ជែល ឬអាល់កុលឱ្យបានញឹកញាប់ ៣-រក្សារគម្លាតសុវត្ថិភាព ១.៥ម៉ែត្រ ៣កុំ ១-កុំនៅក្នុងបន្ទប់បិទជិត ២-កុំចូលទៅតំបន់ដែលមានមនុស្សអ៊ូអរកុះករច្រើន ៣-កុំចាប់ដៃគ្នា ឬអោបគ្នា៕ដោយ ភាវុន
