ព្រះវិហារៈ លោក សំ លាងទ្រី ប្រធានក្រុមការងារខេត្ត ចុះជួយស្រុកសង្គមថ្មី ខេត្តព្រះវិហារ និងលោក គោ ស៊ុំប៊ុនសឿត អនុប្រធានក្រុមការងារខេត្ត ចុះជួយស្រុក នៅថ្ងៃទី១៩ ខែមីនា ឆ្នាំ២០២១នេះ បានចុះជួបសំណេះសំណាល សួរសុខទុក្ខមន្ត្រីគណបក្សប្រជាជនកម្ពុជាឃុំត្បែងមួយ និងនាំថវិកា ព្រមទាំងគ្រឿងឧបភោគ បរិភោគ ប្រគេនព្រះសង្ឃគង់វត្តទក្សិណគីរីហៅ វត្តសំឡាញ ស្ថិតក្នុង ភូមិសំឡាញ ឃុំត្បែងមួយ ស្រុកសង្គមថ្មី ខេត្តព្រះវិហារ។
ក្នុងឱកាសនោះដែរលោក សំ លាងទ្រី ក៏បានពាំនាំនូវការផ្តាំផ្គើសាកសួរសុខទុក្ខពីលោកទេសរដ្ឋមន្ត្រី មាស សុភា ប្រធានក្រុមការងារថ្នាក់កណ្តាល ចុះជួយខេត្តព្រះវិហារ និងលោក ប្រាក់ សុវណ្ណ ប្រធានគណៈកម្មាធិការគណបក្សប្រជាជនកម្ពុជាខេត្ត ដែលជានិច្ចជាកាលតែងគិតគូរជានិច្ចអំពី សុខទុក្ខ និងការរស់នៅរបស់មន្ត្រីនៅតាមមូលដ្ឋាន។
លោក សំ លាងទ្រី ក៏បានជម្រាបជូនមន្ត្រីគណបក្សនៅតាមមូលដ្ឋាន ពីសភាពការណ៍ថ្មីៗ ដែលកើតមានឡើងនៅក្នុងប្រទេសរបស់យើង ពិសេសសភាពការណ៍ជំងឺកូវីដ-១៩ ដែលបានឆ្លងចូលសហគមន៍ ចាប់តាំងពីថ្ងៃទី២០ ខែកុម្ភៈ ឆ្នាំ២០២១ កន្លងទៅនេះ។ ដែលរហូតមកដល់ថ្ងៃនេះ នៅក្នុងប្រទេសកម្ពុជា មានអ្នកឆ្លងជំងឺកូវីដ-១៩ ចំនួន ១,៥៧៨នាក់ បានព្យាលជាសះស្បើយ ៩១៧នាក់ កំពុងព្យាបាលចំនួន៦៥៨នាក់។
លោកក៏បានណែនាំដល់មន្ត្រីគណបក្សនៅតាមមូលដ្ឋាន បន្តចុះអប់រំណែនាំប្រជាពលរដ្ឋ ឱ្យយល់ដឹង និងត្រូវមានការប្រុងប្រយ័ត្នជានិច្ច ពិសេសត្រូវអនុវត្តន៍ឱ្យបានទៀងទាត់ តាមការណែនាំរបស់ក្រសួង សុខាភិបាល និងអនុវត្តន៍តាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន គឺ «៣កុំ និង៣ការពារ» ដែលជាវិធានការដ៏មានប្រសិទ្ធិភាពខ្ពស់បំផុតផងដែរ៕
