កណ្តាល ៖ បុរសម្នាក់ដែលស្ទាត់ជំនាញខាងលក់ថ្នាំញៀន៥ឆ្នាំមកហើយនោះ ទើបតែកម្លាំងសមត្ថកិច្ចជំនាញ ឃាត់ខ្លួនបានកាលពីថ្ងៃទី០៥ ខែមករា ឆ្នាំ២០២៣ វេលា ម៉ោង១០និង២៦នាទី នៅចំណុចក្នុងផ្ទះជនសង្ស័យ ស្ថិតនៅភូមិចំការជោ ឃុំពេីក ស្រុក អង្គស្នួល ខេត្តកណ្តាល ហើយមានដីកាបង្គាប់ឱ្យចាប់ខ្លួនថែមទៀតផង។
សមត្ថកិច្ចនិយាយថា ជនសង្ស័យឈ្មោះ យស់ យឿន ភេទប្រុស អាយុ៤៣ឆ្នាំ ជនជាតិខ្មែរ មុខរបរមិនពិត រស់នៅភូមិចំការជោ ឃុំពេីក ស្រុកអង្គស្នួល ខេត្តកណ្តាល ។ ជនសង្ស័យរូបនេះមានដីកាបង្គាប់ឱ្យចាប់ខ្លួនលេខ៤៧៧/២១ ចុះថ្ងៃទី០៩ សីហា ២០២១ របស់ចៅក្រមស៊េីបសួរនៃសាលាដំបូងខេត្តកណ្តាល អាត ច័ន្ទដារា ពីបទជួញដូរ និងរក្សាទុកដោយខុសច្បាប់នូវសារធាតុញៀន ប្រព្រឹត្តនៅភូមិចំការជោ ឃុំពេីក ស្រុក អង្គស្នួល ខេត្តកណ្តាល កាលពីថ្ងៃទី០៥ មិថុនា ២០២១ និង ធ្លាប់ជាប់ពន្ធនាគារខេត្តកណ្តាល០២លេីក លេីកទី១ រយៈពេល១៣ខែ លេីកទី២រយៈពេល១ឆ្នាំ ពីបទជួញដូរដោយខុសច្បាប់នូវសារធាតុញៀន។
វត្ថុតាងដកហូត ថ្នាំញៀនគ្រាប់ពណ៌ក្រហម(wy) ចំនួន០៣គ្រាប់,ជញ្ជីងថ្លឹងថ្នាំញៀន ចំនួនមួយ, ទូរសព្ទដៃ១គ្រឿង ម៉ាកណូគាចុចពិល,ឧបករណ៍ប្រើប្រាស់ និងវេចខ្ចប់ថ្នាំញៀនមួយចំនួន ។ សមត្ថកិច្ចបន្តថា ដំបូងកម្លាំងផ្នែកជំនាញស្រុកអង្គស្នួល សហការជាមួយកម្លាំងនគរបាលប៉ុស្តិ៍រដ្ឋបាលពេីក បានទទួលព័ត៌មានពីមហាជនល្អ ថាមានមុខសញ្ញាកំពុងជួញដូរថ្នាំញៀន នៅចំណុចកេីហេតុ និង តាមការគ្រប់គ្រងមុខសញ្ញាមានដីកាបង្គាប់ឱ្យចាប់ខ្លួន ។
ក្រោយទទួលព័ត៌មានបានភ្លាម កម្លាំងជំនាញ និងប៉ុស្តិ៍ បានចុះដល់កន្លែងកេីតហេតុ ធ្វេីការឃាត់ខ្លួនជនសង្ស័យម្នាក់ មានដីកាបង្គាប់ឱ្យចាប់ខ្លួនចំនួន១ច្បាប់។ បន្ទាប់មកកម្លាំងចម្រុះ រួមជាមួយបងស្រីបង្កេីត និងនៅចំពោះមុខជនសង្ស័យ បានធ្វើការឆែកឆេរផ្ទះជនសង្ស័យ រកឃេីញថ្នាំញៀនគ្រាប់ពណ៌ក្រហម(wy) ចំនួន០៣គ្រាប់ ជញ្ជីងថ្លឹងថ្នាំញៀន ចំនួន០១ និង មានឧបករណ៍ប្រើប្រាស់វេចខ្ចប់ថ្នាំញៀនមួយចំនួនទៀត។
ជនសង្ស័យបានឆ្លើយសារភាពថា«ថ្នាំញៀនwyនេះ តម្លៃ៣០០០០រៀល(បីម៉ឺនរៀល) បានទិញមកពីមុខសញ្ញាមិនស្គាល់នៅកំបូល ខណ្ឌកំបូល និងកន្លងមកធ្លាប់បានទិញថ្នាំញៀនម៉ាទឹកកក ចំនួន៨ម៉ឺនរៀល លក់បាន១២ម៉ឺនរៀល និងចេះប្រេីប្រាស់ លក់ ថ្នាំញៀន រយៈពេលប្រហែល៥ឆ្នាំមកហេីយ »។
ជនសង្ស័យ រួមជាមួយវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុក ដើម្បីសាកសួរបន្ត និងកសាងសំណុំរឿងចាត់ការតាមនីតិវិធី៕
