ព្រះវិហារ៖(យោធភូមិភាគទី៤) នៅព្រឹកថ្ងៃទី ០៣ ខែមករា ឆ្នាំ២០២៣នេះ នៅទីបញ្ជាការតំបន់ប្រតិបត្តិការសឹករងព្រះវិហារ បានរៀបចំកិច្ចប្រជុំបូកសរុបលទ្ធផលការងារយោធា ប្រចាំខែធ្នូ ឆ្នាំ២០២២ និងដាក់ចេញទិសដៅការងារយោធា ប្រចាំខែមករា ឆ្នាំ២០២៣ និងប្រគល់លិខិតសរសើរ សេចក្ដីសម្រេចតែងតាំងមុខងារជូននាយទាហានចំណុះទីបញ្ជាការផងដែរ។
កិច្ចប្រជុំនេះធ្វើឡើង ក្រោមអធិបតីភាព ឯកឧត្តម ឧត្តមសេនីយ៍ទោ ច័ន្ទ សុភ័ក្ដ្រា មេបញ្ជាការ តំបន់ប្រតិបត្តិការសឹករងព្រះវិហារ និងមានការចូលរួមពីសំណាក់ ឯកឧត្តម មេបញ្ជាការរង លោកមេបញ្ជាការរង នាយសេនាធិការ មេបញ្ជាការវរសេនាតូចទាំង២ មេបញ្ជាការកងអនុសេនាធំ មេបញ្ជាការ មេបញ្ជាការរង ក្រុង-ស្រុក នាយការិយាល័យ ផ្នែក អង្គភាពចំណុះទីបញ្ជាការតំបន់ប្រតិបត្តិការសឹករងព្រះវិហារជាច្រើនរូប ។
ឯកឧត្ដម មេបញ្ជាការ បានដាក់ចេញនូវផែនការមួយចំនួនដើម្បីអនុវត្តបន្ដ និងបានផ្ដាំផ្ញើជម្រុញបន្ថែមដល់តាមបណ្ដាអង្គភាព ក្រុង-ស្រុក ត្រូវយកចិត្តទុកដាក់ចំពោះការងារអតីតយុទ្ធជននៅតាមមូលដ្ឋាន ដើម្បីត្រៀមលើកផ្ទះជូនពួកគាត់ និងតាមខ្សែបន្ទាត់ព្រំដែន កម្ពុជា-ថៃ-ឡាវ ត្រូវយកចិត្តទុកដាក់ការពារបូរណភាពទឹកដី និងការងារទំនាក់ទំនងអោយបានល្អ ទប់ស្កាត់រាល់បទល្មើសផ្សែងៗ ពិសេសបញ្ហារគ្រឿងញៀនឆ្លងដែន និងផ្សព្វផ្សាយពីបទវិន័យទូទៅនៃកងយោធពលខេមរភូមិន្ទ និងសភាពការណ៍ថ្មីៗដល់អង្គប្រជុំ គ្រប់អង្គភាពត្រូវបន្តយកចិត្តទុកដាក់ ហ្វឹកហ្វឺនតាមបណ្តាលកងឯកភាពនូវយុទ្ធវិធី ជំនាញជាក់ស្តែង ការងារអប់រំចិត្តសាស្ត្រ សតិអារម្មណ៍ ការងារបំផុសចលនាប្រឡងប្រណាំងទៅតាមបណ្តាអង្គភាព សាមគ្គីភាពផ្ទៃក្នុងអង្គភាពអោយបានល្អ និងមិនអោយមានការប្រើប្រាស់គ្រឿងញៀនជាដាច់ខាតនៅក្នុងអង្គភាព ៕
