ក្រចេះ៖ ឯកឧត្ដម រ័ត្ន ហុក អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងនាយកគម្រោង LASED III បានដឹកនាំគណៈប្រតិភូថ្នាក់ជាតិ និងក្រុមការងារធនាគារពិភពលោក (World Bank) រដ្ឋបាលខេត្តក្រចេះ មន្ទីររៀបចំដែនដីខេត្ត នៅរសៀលថ្ងៃទី១០ ខែតុលា ឆ្នាំ២០២២នេះ បានចុះពិនិត្យដល់ទីតាំងដីសម្បទានសង្គមកិច្ចផ្ទាល់តែម្តង ដើម្បីដាក់បញ្ចូលទីតាំងដីក្នុងខេត្តក្រចេះ ជាដីសម្បទានសង្គមកិច្ច ចែកជូនប្រជាពលរដ្ឋក្រីក្រជាង ៤០០គ្រួសារ ក្នុងមូលដ្ឋាន ឃុំក្បាលដីរី ដើម្បីកាត់បន្ថយភាពក្រីក្រ ជួយសម្រួលដល់ជីវភាពរស់នៅប្រចាំថ្ងៃរបស់ពួកគាត់ អោយមានជីវភាពកាន់តែប្រសេីរឡេីងមួយកម្រិតទៀត ។
ក្នុងឱកាសអញ្ជើញចុះទស្សនកិច្ចទីតាំងដីសម្បទានសង្គមកិច្ច នារសៀលថ្ងៃនោះដែរ ឯកឧត្ដម រ័ត្ន ហុក បានមានប្រសាស៍ ពាំនាំនូវការផ្ដាំសាកសួរសុខទុក្ខយ៉ាងកក់ក្ដៅពី ឯកឧត្តម ជា សុផារ៉ា រដ្ឋមន្រ្ដីក្រសួងរៀបចំដែនដី នគរូបនីយកម្ម និងសំណង់ ដោយលេីកឡេីងថា ឯកឧត្តម បានយកចិត្តទុកដាក់យ៉ាងខ្លាំងចំពោះជីវភាពរស់នៅរបស់ប្រជាពលរដ្ឋ ជាពិសេសប្រជាពលរដ្ឋក្រីក្រ និងគ្មានដី ។
ឯកឧត្ដម បានកោតសរសើរ និងវាយតម្លៃខ្ពស់ចំពោះកិច្ចខិតខំរបស់អាជ្ញាធរគ្រប់លំដាប់ថ្នាក់ដែលបានបំពេញការងារបែងចែកដីជូនសម្បទានិកចំគោលដៅ ជាពិសេសបងប្អូនជាសម្បទានិកផ្ទាល់ ដែលបានចូលរួមសហការជាមួយអាជ្ញាធរ ក្នុងការសម្របសម្រួល និងទទួលយកដីតាមការបែងចែករបស់អាជ្ញាធរ ស្របទៅតាមនីតិវិធីច្បាប់ ប្រកបដោយប្រសិទ្ធភាព តម្លាភាព។ យើងនឹងបន្តស្វែងរកមុខសញ្ញាសម្បទានិក ដែលកំពុងខ្វះខាតដីពិតប្រាកដ ដើម្បីធ្វើការបែងចែកជូន ដំដៅលើកកម្ពស់ជីវភាពនិងកាត់បន្ថយភាពក្រីក្រនៅមូលដ្ឋាន។
ឯកឧត្តម អនុរដ្ឋលេខាធិការស្នើរសុំឲ្យបងប្អូនសូមឲ្យកុំគិតចង់លក់ដូរដីដែលបានមកពីការខិតខំរបស់បងប្អូនឲ្យសោះ ត្រូវខិតខំថែរក្សា និងបង្ករបង្កើនផលដាំដុះឲ្យបានច្រើន ដើម្បីលើកកម្ពស់សេដ្ឋកិច្ចជីវភាពប្រចាំថ្ងៃ ហើយបងប្អូនដែលមិនទាន់ទទួលបានដី សូមចូលរួមសហការដាក់ពាក្យស្នើសុំដីមកអាជ្ញាធរមូលដ្ឋាន ។
លោក ដួង ពៅ អភិបាលរងខេត្ត បានមានមតិស្វាគនម៍យ៉ាងកក់ក្ដៅ និងកោតសរសេីរដល់ថ្នាក់ដឹកនាំគម្រោង របស់ក្រសួងរៀបចំដែនដី នគរូបនីយកម្ម និងសំណង់ ក្រសួងសេដ្ឋកិច្ច និងហិរញ្ញវត្ថុ និងក្រុមការងារធនាគារពិលោក ដែលបានយកចិត្តទុកដាក់ ខិតខំប្រឹងប្រែងអស់ពីកម្លាំងកាយចិត្ត ផ្ដួចផ្ដេីមគំនិតដាក់បញ្ចូលទីតាំងដីក្នុងខេត្តក្តចេះ ជាដីសម្បទានសង្គមកិច្ច ចែកជូនប្រជាពលរដ្ឋក្រីក្រជាង៤០០គ្រួសារ ក្នុងមូលដ្ឋាន ឃុំក្បាលដីរីនេះ គឺបានជួយសម្រួលយ៉ាងខ្លាំង ដល់ជីវភាពរស់នៅប្រចាំថ្ងៃរបស់ពួកគាត់ និងមានជីវភាពកាន់តែប្រសេីរឡេីងមួយកម្រិតទៀត។
