ព្រះវិហារ៖ ក្រុមហ៊ុន២ រួមមានក្រុមហ៊ុន អេម រុរ៉ាយស៍ កម្ពុជា និងក្រុមហ៊ុនសាជីវកម្មសហគមន៍កសិកម្មកម្ពុជា បានបន្ដចុះកិច្ចព្រមព្រៀងស្ដីពីការអនុវត្តន៍ផលិតកម្មកសិកម្មតាមកិច្ចសន្យា ក្នុងការផលិត និងផ្គត់ផ្គង់ស្រូវ និងដំឡូងមីសរីរាង្គ ជាមួយក្រុមផលិត សហគមន៍កសិកម្មក្នុងខេត្តព្រះវិហារ លើបរិមាណសរុប៦៦,០០០តោន សម្រាប់រដូវកាលឆ្នាំ២០២២នេះ ដែលក្នុងនោះក្រុមហ៊ុនអេមរុរ៉ាយស៍កម្ពុជាចុះកុងត្រាបញ្ជាទិញស្រូវសរីរាង្គ លើបរិមាណ ១១,០០០តោន ពីសហគមន៍ចំនួន២១ និងក្រុមហ៊ុនសាជីវកម្មសហគមន៍កសិកម្មកម្ពុជា ចុះកិច្ចព្រមព្រៀងបញ្ជាទិញដំឡូងមីសរីរាង្គ លើបរិមាណ ៥៥,០០០តោន ពីសហគមន៍ចំនួន ១០ក្នុងចំណោមសហគមន៍ទាំង២១ខាងលើ។
កិច្ចព្រមព្រៀងនេះប្រព្រឹត្តិទៅក្រោមកិច្ចសហការ និងជួយជ្រោមជ្រែងពីមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារ មន្ទីរពាណិជ្ជកម្មខេត្ត អង្គការដៃគូរ ព្រមទាំងសហភាពសហគមន៍ព្រះវិហារមានជ័យ ដែលត្រូវបានធ្វើឡើង នាព្រឹកថ្ងៃទី៣១ ខែសីហា ឆ្នាំ២០២២ ក្រោមអធិបតីភាព ឯកឧត្តម គីម រិទ្ធី អភិបាលនៃគណ:ភិបាលខេត្ត ដែលមានការអញ្ជើញចូលរួមពីសំណាក់ ឯកឧត្តម អ៊ុក គឹមសាន្ដ អភិបាលរងខេត្ត លោកឧកញ៉ា សុង សារ៉ន អគ្គនាយកក្រុមហ៊ុនអេមរុរ៉ាយស៍ លោក ពឹង ទ្រីដា ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្ត ប្រធានលេខាធិការដ្ឋានសហព័ន្ធស្រូវអង្ករកម្ពុជា ប្រធានមន្ទីរពាណិជ្ជកម្មខេត្ត អង្គការដៃគូរអភិវឌ្ឍន៍ សហភាពសហគមន៍កសិកម្មព្រះវិហារមានជ័យ ថ្នាក់ដឹកនាំសហគមន៍កសិកម្ម ទាំង២១ និងកសិករជាក្រុមផលិតជាច្រើនរូបទៀតផងដែរ៕sks
