ខេត្តស្វាយរៀង:លោក ហែម ពិសិដ្ឋ អភិបាលរងខេត្តស្វាយរៀង តំណាងលោក ម៉ែន វិបុល អភិបាលខេត្តនៅ
ព្រឹក ថ្ងៃទី៣០ ខែសីហា ឆ្នាំ២០២២បានអញ្ជើញចុះពិនិត្យទីតាំងចេតិយ៍ ០១កន្លែង (ប្រាសាទវត្តទួល) ដែលបានសាងសង់ក្នុងអំឡុងឆ្នាំ១៩៦៨ ស្ថិតនៅភូមិព្រះទន្លេ សង្កាត់សង្ឃ័រ ក្រុងស្វាយរៀង ដើម្បីសិក្សារៀបចំទៅជាតំបន់រមណីយដ្ឋានទេសចរណ៍វប្បធម៌ ។
លោក អ៊ុង សារិន អាយុប្រមាណជាង 60 សព្វថ្ងៃរស់នៅភូមិព្រះទន្លេសង្កាត់សង្ឃ័រក្រុងស្វាយរៀងខេត្តស្វាយរៀងបានឲ្យដឹងថា: អ្នកកសាងចេតិយ៍នេះត្រូវជា អ៊ំ របស់គាត់ឈ្មោះ អ៊ុង សាវុធមានឋានៈជាឧត្តមសេនីយ៍ត្រីក្នុងសម័យលន់ ណុលរស់នៅរាជធានីភ្នំពេញ បានកសាងនៅឆ្នាំ 1968 ហើយបានយកជាងដែលជាអ្នកសាងសង់ធ្វើវិមានឯករាជ្យយកមកធ្វើចេតិយហ្នឹងរូបចម្លាក់រចនាបថនេះគឺស្រដៀងនឹងវិមានឯករាជ្យទាំងអស់រហូតដល់សង្គ្រាមឆ្នាំយៀកកុងចូលកំឡុងឆ្នាំ 1970 ជាងសាងសង់បានរត់រប៉ាត់រប៉ាយចោលទាំងអស់ដោយបានបន្សល់ទុកនៅក្បាច់ក្បូរនៅទីនេះទាំងអស់កាលនោះចេតិយ៍នេះធ្វើមិនទាន់ហើយទេគម្រោងរបស់គាត់ចាក់សាបក្នុងខឿននោះតែមិនទាន់បានចាក់សាបទេហើយស៊ីម៉ង់ដែលបានទិញនោះនៅខាងក្នុងទុកចោលពេញហ្នឹងគាត់ក៏រត់ចោល ជាងក៏រត់ចោលដោយបន្សល់ទុកនូវរបស់របរពេញហ្នឹងហើយគំរោងរបស់គាត់គឺធ្វើថ្នល់គ្រួសបន្ត ចាប់ពីផ្លូវលេខ 13 រហូតដល់ចេតិយ៍ហ្នឹងបន្ថែមទៀត។
លោកបានបនតទៀតថា:គម្រោងគាត់នៅពេលធ្វើហើយនឹងធ្វើបុណ្យឆ្លងចេតិយ៍តែមិនទាន់បានឆ្លងទេក្រោយមករូបលោកនឹងបងប្អូនកូនចៅនៅភ្នំពេញបានចូលគ្នាយកស៊ីម៉ង់មកចាក់សាបបំពេញខឿនហើយរូបតោដែលនៅជុំវិញចេតិយ៍បានបាត់បង់អស់ហើយពីព្រោះក្នុងសម័យប៉ុលពតត្រូវបានវា វាយកម្ទេចចោលខ្ទេចខ្ទីរអស់ទាំងបង្កាន់ដៃសងខាងខ្ទេចខ្ទីរអស់ហើយឥឡូវនេះបានជួសជុលបានស្អាតឡើងវិញ។
លោកបានបន្ថែមទៀតថា:នៅពេលមុន (សម័យលន់ ណុល)រហូតដល់បច្ចុប្បន្ននេះក៏មានសិស្សានុសិស្សបានមកលេងរហូតមិនដាច់និងថតរូបនៅចេតិយ៍ទីនេះមិនដែលដាច់នោះដែរ។
ដោយឡែកស្ត្រីចំណាស់ឈ្មោះព្រាប សាមឿន មានអាយុប្រមាណ៧០ ឆ្នាំ ក៏បានរៀបរាប់ឱ្យដឹងផងដែរថា: កាលដើមឡើយនៅទីនេះគឺជាទីទួលរូបគាត់កើតមកឃើញតែម្ដង ហើយទីស្រឡាញ់នេះក៏មានព្រះសង្ឃគង់នៅផងដែរដោយមានកុដតូចៗ និងសាលាឆាន់សម្រាប់ឲ្យព្រះសង្ឃគង់នៅស្នាក់អាស្រ័យរៀនធម៌អាថ៌ហើយនៅជុំវិញតួនេះក៏មានប្រជាពលរដ្ឋធ្វើស្រែចំការធម្មតាគឺស្រែជម្រៅមានផ្លូវចូលដូចអង្គរវត្តផងដែរ។