សហគមន៍កសិកម្មចំនួន ៨ ក្នុងខេត្តព្រះវិហារបានទំនាក់ទំនងជាមួយក្រុមហ៊ុនប្រមូលទិញកសិផលដែលសហគមន៍ផលិតបាន

ព្រះវិហារៈ នៅព្រឹកថ្ងៃទី២៥ ខែកក្កដា ឆ្នាំ២០២២នេះ សហភាពសហគមន៍កសិកម្មព្រះវិហារមានជ័យ(PMUAC) រួមនឹងមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ បានទំនាក់ទំនង និងសហការជាមួយក្រុមហ៊ុនម៉ូនីតា-ប៊ីអអិម (Monita-BRM) រហូតឈានដល់ការចុះកិច្ចសន្យា ធ្វើឡើងរវាង PMUAC និងក្រុមហ៊ុនម៉ូនីតា-ប៊ីអអិម (Monita-BRM) លើការផលិត និងផ្គត់ផ្គង់ស្រូវសរីរាង្គ (ស្រូវក្រអូប) ចំនួន ២,០០០ តោន ពីសហគមន៍កសិកម្មចំនួន ៨ ក្នុងខេត្តព្រះវិហារ។

ក្នុងឆ្នាំ២០២១កន្លងទៅសហគមន៍កសិកម្មទាំងអស់នៅក្នុងខេត្តព្រះវិហារទាំងមូល បានចុះកិច្ចសន្យាទិញលក់ផលិតផលសរីាង្គរបស់ខ្លួន ១.ផលិតកម្មស្រូវរីរាង្គ៖ មានសហគមន៍កសិកម្មសរុបចំនួន៣២សហគមន៍កសិកម្មបានចុះកិច្ចសន្យាទិញលក់ស្រូវសរីរាង្គអោយក្រុមហ៊ុនក្នុងនិងក្រៅស្រុកចំនួន៤ ក្នុងនោះមានក្រុមហ៊ុន អេមរ៉រ៉ាយ(Amru Rice), ក្រុមហ៊ុនស៊ីកណេតឈ័រអហ្វអេស៊ា(Signatures of Asai),ក្រុមហ៊ុនហ្គោលដេនរ៉ាយ(Goldden Rice) និងក្រុមហ៊ុន ហ៊ុនអេទីកាប (Ethiquable) ក្នុងបរិមាណសរុប 19,850.8 តោន ដោយមានសមាជិកផលិតសរុប 4,810គ្រួសារ លើផ្ទៃដីសរុប17,618ហិកតា។ជាក់ស្តែងក្រោយពីការចុះកិច្ចន្យា ភាគីទាំងអស់ចាប់ផ្តើមប្រមូលទិញបានសរុបចំនួន16,051.1តោន ស្មើនឹងជាង៨១% នៃផែនការសរុប។

២.ផលិតកម្មដំឡូងមីសរិរាង្គ៖ មានសហគមន៍កសិកម្មសរុបចំនួន៩សហគមន៍កសិកម្មបានចុះកិច្ចសន្យាទិញលក់ដំឡូងសរីរាង្គស្រស់អោយក្រុមហ៊ុនថៃវ៉ា(THAI Wa) ក្រោមការសម្របសម្រួលពីក្រុមហ៊ុនសាជីវកម្មសហគមន៍កសិកម្មកម្ពុជា(CACC) ក្នុងបរិមាណសរុប 33,729.00តោន ដោយមានសមាជិកផលិតសរុប 1,284គ្រួសារ លើផ្ទៃដីសរុប2,509ហិកតា។ជាក់ស្តែងក្រោយពីការចុះកិច្ចន្យា ភាគីទាំងពីរចាប់ផ្តើមប្រមូលទិញបានសរុបចំនួន19,600.០០តោន ប្រមាណជាជិត៦០%  នៃផែនការសរុប។

៣.ផលិតកម្មគ្រាប់ស្វាយចន្ទីសរីរាង្គ៖ មានសហគមន៍កសិកម្មចំនួន០៧ បានចុះកិច្ចសន្យាផលិតផ្គត់ផ្គង់គ្រាប់ស្វាយចន្ទីសរីរាង្គលក់ជូនក្រុមហ៊ុនពីរគឺក្រុមហ៊ុនសាជីវកម្មសហគមន៍កសិកម្មកម្ពុជា(CACC) បានចំនួន39.22តោន និងក្រុមហ៊ុនថបផ្លេននីង(Top Planning)បានចំនួន10.22តោន។

ឆ្នាំ២០២២ នេះសហគមន៍កសិកម្មចំនួន១២សហគមន៍កសិកម្ម បានចុះកិច្ចសន្យាផលិតនិងផ្គត់ផ្គង់គ្រាប់ស្វាយចន្ទីសរីរាង្គ ជូនក្រុមហ៊ុនចំនួន០២ ក្នុងនោះមាន៖- ក្រមហ៊ុនកាំយ៉ា(KAMYA) ក្នុងបរិមាណសរុបចំនួន 68.774តោន- ក្រុមហ៊ុនថបផ្លេននីង(Top Planning) ក្នុងបរិមាណសរុបចំនួន 30តោនផងដែរ៕