ខេត្តប៉ៃលិន ៖ មនុស្សប្រុសស្រីចំនួន៦នាក់ បានរងរបួសធ្ងន់ស្រាល ត្រូវបានគេបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ដោយសារករណីគ្រោះថ្នាក់ចរាចរណ៍២ករណីកើតឡើងនៅក្នុងថ្ងៃដដែល ខណ:ដែលអ្នកបើកបរម៉ូតូទាំងនេះ អត់គោរពច្បាប់ចរាចរឡើយ ដែលហេតុការណ៍នេះបានក កើតឡើងនៅក្នុងក្រុងប៉ៃលិន។
ករណីទី១. ហេតុការណ៍នេះ បានកើតឡើងកាលពីវេលាម៉ោង៦ និង៣៥នាទី ល្ងាចថ្ងៃទី២៣ ខែកក្កដា ឆ្នាំ២០២២ នៅចំណុចមុខហាង យីហោ «ខួរចំហុយបាត់ដំបង» ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន បណ្តាលឲ្យស្រ្តីម្នាក់ រងរបួសធ្ងន់ បុរស២នាក់ រងរបួសស្រាល ខូចខាតម៉ូតូកំរិតធ្ងន់០១គ្រឿង និងខូចខាតម៉ូតូកំរិតស្រាល០២គ្រឿង ។
ប្រភពព័ត៌មានបានឱ្យដឹងថា ជនរងគ្រោះភាគីក. ឈ្មោះ អែម ភឿង ភេទប្រុស អាយុ៤២ឆ្នាំ មុខរបរជាងឈើ រស់នៅភូមិតាគ្រក់ ឃុំត្រែង ស្រុករតនមណ្ឌល ខេត្តបាត់ដំបង បើកបរម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២០ ពាក់ស្លាកលេខ 1C-9095 (របួសស្រាល) ក្នុងទិសដៅពីជើងទៅត្បូង (ខូចខាតធ្ងន់)។ ចំណែកភាគីខ មាន ឈ្មោះ ហ៊ឹង រតន: ភេទប្រុស អាយុ៣៤ឆ្នាំ មុខរបរកសិករ (រងរបួសស្រាល) រស់នៅភូមិអូរច្រាកណ្ដាល សង្កាត់ទួលល្វា ក្រុងប៉ៃលិន ដោយបើកបរម៉ូតូម៉ាកហុងដាវ៉េវ ពណ៌ខ្មៅ ស៊េរីឆ្នាំ២០២០ ពាក់ផ្លាកលេខ ប៉ៃលិន 1C-4455 ក្នុងទិសដៅពីជើងងទៅត្បូង (ខូចខាតស្រាល)។
ចំណែកអ្នករួមដំណើរ ឈ្មោះ សួង សត្តា ភេទស្រី អាយុ៣០ឆ្នាំ មុខរបរមេផ្ទះ រស់នៅភូមិអូរច្រាកណ្ដាល សង្កាត់ទួលល្វា ក្រុងប៉ៃលិន (របួសធ្ងន់)។ មូលហេតុបណ្តាលមកពីកត្តាមនុស្សបើកបរបត់ដោយគ្មានការប្រុងប្រយ័ត្ន មិនគោរពផ្លូវអាទិភាព។
ករណីទី២. គ្រោះថ្នាក់ចរាចរណ៍រវាងម៉ូតូ និងម៉ូតូកើតឡើងកាលពីវេលាម៉ោង៧ និង៣០នាទីយប់ថ្ងៃទី២៣ ខែកក្កដា ឆ្នាំ២០២២ នៅចំណុចផ្លូវចូលរហាត់ទឹក ស្ថិតក្នុងភូមិសួនអំពៅលិច សង្កាត់ប៉ៃលិន ក្រុងប៉ៃលិន បណ្តាលឲ្យមនុស្សរងរបួសស្រាល០២នាក់ ស្រីម្នាក់ ខូចខាតម៉ូតូស្រាល០២ គ្រឿង។ ប្រភពព័ត៌មានឱ្យដឹងថា ភាគីក ឈ្មោះ ញ៉ែម មង្គល ភេទប្រុស អាយុ២៦ឆ្នាំ មុខរបរកសិករ(របួសស្រាល) រស់នៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន បើកបរម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២០ ពាក់ផ្លាកលេខប៉ៃលិន 1C-8961 ក្នុងទិសដៅពីត្បូងទៅជើង (ខូចខាតស្រាល) ។ ភាគីខ ឈ្មោះ ហាង ឡា ភេទស្រី អាយុ៤១ឆ្នាំ មុខរបរលក់ដូរ (របួសស្រាល) រស់នៅភូមិសួនអំពៅលិច សង្កាត់ប៉ៃលិន ក្រុងប៉ៃលិន បើកបរម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ២០២១ ពាក់ផ្លាកលេខ ប៉ៃលិន 1C-5094 ក្នុងទិសដៅពីជើងទៅត្បូងបត់ឆ្វេង (រងការខូចខាតស្រាល)។ មូលហេតុៈបណ្តាលមកពីកត្តាមនុស្សបើកបរបត់ឆ្វេងដោយគ្មានការប្រុងប្រយ័ត្ន មិនគោរពផ្លូវអទិភាព។
ករណីខាងលើនេះ កម្លាំងផែនសណ្តាប់ធ្នាប់ចរាចរណ៍នៃអធិការដ្ឋាននគរបាលក្រុងប៉ៃលិន បានយកវត្ថុតាងទាំងសងខាងមករក្សាទុក រង់ចាំការដោះស្រាយតាមនីតិវិធី៕ ដោយ ៖ នីយ៉ា
