កណ្តាល ៖ មនុស្ស១៣នាក់ចំណោម១៥នាក់ ត្រូវបានសមត្ថកិច្ចបង្ហាញមុខនាថ្ងៃទី២២ កក្កដា បន្ទាប់ពីកម្លាំងសមត្ថកិច្ចស្រុកកៀនស្វាយ សហការជាមួយសមត្ថកិច្ចខណ្ឌច្បារអំពៅ ឃាត់ខ្លួនជាបន្តបន្ទាប់ ពីបទ «កាន់កាប់កាំភ្លើងខ្លីខុសច្បាប់ និង ជួញដូរដោយខុសច្បាប់នូវសារធាតុញៀន»កាលពីថ្ងៃទី២០ ខែកក្កដា ឆ្នាំ២០២២ វេលាម៉ោង ០៥និង៣០នាទី នៅចំណុចភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល។
សមត្ថកិច្ចបានអោយដឹងថា ជនសង្ស័យសរុបមានគ្នា១៥នាក់រួមមាន ១-ឈ្មោះ ហេង រិទ្ធី ភេទប្រុស អាយុ២៧ឆ្នាំ (ឃាត់ខ្លួន), ២-ឈ្មោះ អ៊ុំ បូរិន ហៅម៉ៅ ភេទប្រុស អាយុ២៥ឆ្នាំ (ឃាត់ខ្លួន) ,៣-ឈ្មោះ យ៉ត ចន្ទដារ៉ា ភេទប្រុស អាយុ៣១ឆ្នាំ (ឃាត់ខ្លួន),៤-ឈ្មោះ យ៉ុន ប៊ុនណារ៉ូ ហៅយក្ស ភេទប្រុស អាយុ២៨ឆ្នាំ(ឃាត់ខ្លួន) ,៥-ឈ្មោះ រឿន ភក្រ្តា ភេទប្រុស អាយុ១៧ឆ្នាំ (ឃាត់ខ្លួន) , ៦-ឈ្មោះ ខេម សុខម៉េង ភេទប្រុស អាយុ១៨ឆ្នាំ (ឃាត់ខ្លួន),៧-ឈ្មោះ សុខរឿន ចិត្រា ភេទប្រុស អាយុ១៧ឆ្នាំ(ឃាត់ខ្លួន)៨-ឈ្មោះ អឿន វណ្ណី ហៅក្នយ ភេទប្រុស អាយុ២០ឆ្នាំ(ឃាត់ខ្លួន),៩-ឈ្មោះ គន់ ប៊ី ភេទប្រុស អាយុ៣២ឆ្នាំ (គេចខ្លួន),១០-ឈ្មោះ ឆិត សុខដា ភេទប្រុស អាយុ២៧ឆ្នាំ (គេចខ្លួន) , ១២-ឈ្មោះ ឃី វណ្ណី ភេទប្រុស អាយុ២៤ឆ្នាំ (ឃាត់ខ្លួន),១២-ឈ្មោះ នី ឆៃយ៉ា ភេទប្រុស អាយុ២២ឆ្នាំ(ឃាត់ខ្លួន),១៣-ឈ្មោះ ទ្រី ធារិទ្ធ ភេទប្រុសអាយុ៤០ឆ្នាំ (ឃាត់ខ្លួន) ,១៤-ឈ្មោះ អ៉ីម គីមសេង ភេទប្រុស អាយុ១៩ឆ្នាំ (ឃាត់ខ្លួន) និង១៥-ឈ្មោះ យ៉ុង សុភ័ក្រ ភេទប្រុស អាយុ៣២ឆ្នាំ ជនជាតិខ្មែរ មុខរបររត់កង់បី មានទីលំនៅក្រុងតាខ្មៅ (ឃាត់ខ្លួន)។
សម្ភារៈចាប់យករួមមាន ម៉ូតូ៦គ្រឿង ,ទូរសព្ទ៣គ្រឿង,វិទ្យុទាក់ទង ០១គ្រឿង(ខូច), កាមេរ៉ា ចំនួន០២គ្រឿង (ខូច),ក្រាមពណ៌ស ចំនួន០៦កញ្ចប់តូច និង០១កញ្ចប់ធំ, កូនសោះដោះមួយ,កាំបិតផ្លែដែកដងជ័រ ចំនួន០៦ដើម,ដែកគាស់ ប្រវែង០,៥៣ម៉ែត្រ ០១ដើម,ញញួរ ដងដែកប្រវែង០,២៨ម៉ែត្រ ០១ដើម,សោសម្រាប់ដោះកង់រថយន្ដប្រវែង០,៤៦ម៉ែត្រ ០១ដើម និងសម្ភារៈសម្រាប់ប្រើប្រាស់គ្រឿងញៀនមួយចំនួន។
សមត្ថកិច្ចបានបន្តថា នៅថ្ងៃ១៩កក្កដា២០២២ វេលាម៉ោង១០យប់ ឈ្មោះ គន់ ប៊ី ភេទប្រុស បានប្រើឈ្មោះ សុខរឿន ចិត្រា ឱ្យទៅយកកាំភ្លើងខ្លី ពីឈ្មោះ យ៉ត ចន្ទដារ៉ា ហៅខ្មៅ, តែពេលឈ្មោះ សុខរឿន ចិត្រា មកដល់ជួបជាមួយឈ្មោះ ហេង រិទ្ធី នៅផ្ទះរបស់ ឈ្មោះ យ៉ត ចន្ទដារ៉ា ហៅខ្មៅ បានហុចកាបូបស្ពាយពណ៌ខ្មៅមកឱ្យឈ្មោះ សុខ រឿនចិត្រា ទទួលយករួចរូតកាបូបយកកាំភ្លើងខ្លី មួយដើមមិនស្គាល់ម៉ាក សៀតចង្កេះ ចេញមកប្រគល់ឱ្យឈ្មោះ គន់ ប៊ី រក្សាទុករួចមកច្រៀងខារ៉ាអូខេយីហោ វ៉ាវ នៅភូមិភូមិធំ ឃុំភូមិធំ ស្រុកកៀនស្វាយ ខេត្តកណ្តាល។
មកដល់ថ្ងៃទី២០ ខែកក្កដា ឆ្នាំ២០២២ វេលាម៉ោង០២អធ្រាត្រ អ្នកទាំង០៤នាក់ ខាងលើបាននាំគ្នាចេញពីបន្ទប់ខារ៉ាអូខេ ដោយឈ្មោះ គន់ ប៊ី ភេទប្រុស និង ឈ្មោះ រឿន ភត្រា ភេទប្រុស ជិះម៉ូតូ មកឈប់ទិញបារី នៅកន្លែងលក់សាំងនៅមុខផ្សារផ្លាហ្សា ក៏ជួបជាមួយកម្លាំងសមត្ថកិច្ចប៉ុស្តិ៍ កំពុងល្បាតដោយមានការសង្ស័យក៏ហៅឈ្មោះ គន់ ប៊ី និងឈ្មោះ រឿន ភត្រា សួរនាំតែអ្នកទាំង០២នាក់ ក៏រត់គេចខ្លួនដោយឈ្មោះ គន់ ប៊ី រត់ចុះក្នុងភូមិក្រោយផ្ទះអ្នកស្រុកមុខផ្សារផ្លាហ្សា ។ដោយបាត់ឈ្មោះ គន់ ប៊ី យូរពេកឈ្មោះ សុខ រឿនចិត្រា និងឈ្មោះ រឿន ភក្ត្រា បានជិះម៉ូតូក៏ជួបឈ្មោះ គន់ ប៊ី កំពុងដើរតាមផ្លូវជាតិលេខ១ ចេញពីកន្លែងកើតហេតុ ឃើញដូច្នេះឈ្មោះ រឿន ភក្ត្រា បានឌុបឈ្មោះ គន់ ប៊ី ឡើងទៅក្រុងតាខ្មៅ។
ពេលនោះឈ្មោះ គន់ ប៊ី បានបបួលឈ្មោះ ខេម សុខម៉េង ឈ្មោះ រឿន ភក្ត្រា ឈ្មោះ យ៉ុន ប៊ុនណារ៉ូ និងឈ្មោះ ឆិត សុខដា ដោយឈ្មោះ ឆិត សុខដា ជិះម៉ូតូ០១គ្រឿង ម៉ាក Honda Dream C125 ពណ៌ខ្មៅ ឌុបឈ្មោះ គន់ ប៊ី ឈ្មោះ ខេម សុខម៉េង ជិះម៉ូតូមួយគ្រឿងម៉ាក Honda Dream C125 ពណ៌សពាក់ស្លាកលេខ កណ្ដាល 1AK-2676 ឌុបឈ្មោះ រឿន ភក្ត្រា ។ចំណែកឈ្មោះ យ៉ុន ប៊ុនណារ៉ូ ហៅយក្ស ជិះម៉ូតូ០១គ្រឿងពាក់ស្លាកលេខ កណ្ដាល1AP-7900 ម្នាក់ឯងត្រឡប់មករកអាវុធដែលខ្លួនលាក់ទុក,នៅពេលរត់គេចខ្លួនពីកម្លាំងល្បាតហៅឆែកសួរនាំ។
បន្ទាប់មកឈ្មោះ គន់ ប៊ី បានធ្វើសកម្មភាព កំហែងយកម៉ូតូ ០១គ្រឿងម៉ាក Smash V ពណ៌ខ្មៅ ពាក់ស្លាកលេខភ្នំពេញ 1BS-3382 ពីឈ្មោះ លាង សុខា ភេទប្រុស អាយុ៣៣ឆ្នាំ ជនជាតិខ្មែរ មុខរបរបើកបរ មានទីលំនៅភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រត់គេចខ្លួនទៅ ដល់ក្រុងតាខ្មៅ រួចក៏ទុកម៉ូតូម៉ាក Smash V នៅផ្ទះកាប់ជ្រូករបស់ឈ្មោះ អ៊ុ បូរិន (ម៉ៅ) នៅសង្កាត់តាខ្មៅ ក្រុងតាខ្មៅ ខេត្តកណ្ដាល រួចហើយក៏រត់គេចខ្លួនបាត់តែម្ដង ។
បន្ទាប់មកកម្លាំងសមត្ថកិច្ចស្រុកកៀនស្វាយ និង ខណ្ឌច្បារអំពៅ តាមរុករកឈ្មោះ គន់ ប៊ី រហូតចាប់បានក្រុមរបស់ឈ្មោះ គន់ ប៊ី ជាបន្តបន្ទាប់នៅក្រុងតាខ្មៅ និងបន្ត ឃាត់បានជនសង្ស័យបាន៦នាក់ទៀត យកមកកាន់អធិការដ្ឋាន ស្រុកកៀនស្វាយ សាកសួរ។
សមត្ថកិច្ចបន្ថែមទៀតថា ជនសង្ស័យ៦នាក់រួមមាន ១.ឈ្មោះ ហេង រិទ្ធី ភេទប្រុស អាយុ២៧ឆ្នាំ មុខរបរមិនពិតប្រាកដ ,២.ឈ្មោះ អ៊ុំ បូរិន ហៅម៉ៅ ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ ,៣.ឈ្មោះ យ៉ត ចន្ទដារ៉ា ភេទប្រុស អាយុ៣១ឆ្នាំ មុខរបរមិនពិតប្រាកដ ,៤.ឈ្មោះ យ៉ុន ប៊ុនណារ៉ូ ហៅយក្ស ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ ៤នាក់មានទីលំនៅ ក្រុងតាខ្មៅ,៥.ឈ្មោះ រឿន ភក្រ្តា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ខណ្ឌមានជ័យ និង៦.ឈ្មោះ អឿន វណ្ណី ហៅខ្នយ ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ក្រុងតាខ្មៅ ខេត្តកណ្ដាល៕
