ព្រះវិហារៈ ច្រកព្រំដែនកម្ពុជាថៃអានសេះ ស្ថិតក្នុងភូមិអានសេះ ឃុំជាំក្សាន្ត ស្រុកជាំក្សាន្តខេត្តព្រះវិហារ ជាប់ព្រំដែនថៃ នៅព្រឹកថ្ងៃទី២១ ខែកក្កដា ឆ្នាំ២០២២នេះ បានបើកដំណើរឱ្យប្រជាពលរដ្ឋចេញ-ចូល ឡើងវិញហើយ បន្ទាប់ពីបិទជាបណ្តុះអាសន្នរយៈពេល២ឆ្នាំ ដោយសារតែការរីករាលដាលនៃជំងឺកូវីដ១៩។ ការបើកឡើងវិញនេះ «តាមការឯកភាពគ្នារវាងភាគីកម្ពុជា និងភាគីថៃ កាលពីថ្ងៃ៣០ ខែមិថុនា ឆ្នាំ២០២២ កន្លងទៅ ថ្ងៃនេះច្រកព្រំដែនអានសេះ ត្រូវបានបើកឡើងវិញដូចការគ្រោងទុក និងដំណើរការបើកច្រកអានសេះ ក៏ដូចជាសកម្មភាពដោះដូរទំនិញគ្នារវាងប្រជាពលរដ្ឋនៃប្រទេសទាំងពីរផងដែរ»។
ប្រជាពលរដ្ឋទាំងពីប្រទេស ក៏បានបង្ហាញក្តីសប្បាយរីករាយ ដោយបានមើលឃើញអាជ្ញាធរបើកអោយដំណើរការច្រកឡើងវិញ ដើម្បីបានអាជីវករគាត់បានប្រកបរបរអាជីវកម្មលក់ដូរឡើងវិញ ដូចមុនព្រឹត្តិការណ៍ជំងឺកូវីដ១៩ មិនទាន់ឆ្លងរាលដាល។
នេះដោយសារ គឺកត្តាទី១៖ សុខសន្តិភាព និងកត្តាទី២៖ ការប្រយុទ្ធប្រឆាំងជំងឺកូវីដ១៩ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជានាយករដ្ឋមន្ត្រីនៃកម្ពុជា ទទួលបានជោគជ័យ។
ក្នុងនោះអាជ្ញាធរក៍ណែនាំបន្ថែមដល់បងប្អូនអាជីវករខ្មែរ ត្រូវបន្តការពារខ្លួនជានិច្ចពីជំងឺកូវីដ១៩ ដោយត្រូវបន្តអនុវត្តតាមការណែនាំរបស់ក្រសួងសុខាភិបាល និងការណែនាំរបស់រាជរដ្ឋាភិបាល «៣កុំ និង៣ការពារ» ឱ្យបានជាប់ជាប្រចាំផង។
សូមបញ្ជាក់ថា នៅក្នុងជំនួបពិភាក្សាកាលពីថ្ងៃទី៣០ ខែមិថុនា ឆ្នាំ២០២២ ស្តីពីការបើកដំណើរការច្រកអានសេះឡើងវិញ ភាគីកម្ពុជា-ថៃ បានការឯកភាពគ្នាដូចខាងក្រោម៖
*ថ្ងៃបើកច្រកមានចំនួន៣ថ្ងៃ គឺថ្ងៃអង្គារ៍ ព្រហស្បតិ៍ និង សៅរ៍ ដោយបើកចាប់ពីម៉ោង៨៖៣០នាទីព្រឹក រហូតដល់ម៉ោង៤៖៣០ រសៀល។
*ប្រជាពលរដ្ឋចេញ-ចូល ត្រូវកត់ឈ្មោះបង្ហាញកាតចាក់វ៉ាក់សាំង បើគ្មានកាតទេ ត្រូវមានលិខិតបញ្ជាក់ពីមណ្ឌលសុខភាព ក្នុងរយៈ ពេល ២៤ម៉ោងប៉ុណ្ណោះ ពាក់ម៉ាស់ ពិនិត្យកំដៅផងដែរ៕
