ខេត្តកណ្តាល៖ លោក ព្រំ ឆាត អនុប្រធានមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តកណ្តាល អំពាវនាវឱ្យប្រជាពលរដ្ឋរស់នៅភូមិអន្លង់ធំ ភូមិកូនជ្រែ និងភូមិព្រែកគ្រួស ក្នុងឃុំព្រែកអំបិល និងម្ចាស់ក្បាលដី មកពិនិត្យមើល ទិន្នន័យក្បាល ដី របស់ ខ្លួន ឱ្យបាន ច្បាស់លាស់ ចៀសវាងខុស កម្មសិទ្ធិ រួម ជា របស់ប្តី របស់ប្រពន្ធ ជារបស់ឪពុកម្តាយ ខុស ឈ្មោះ ថ្ងៃខែឆ្នាំកំណើត ឬបាត់ទំហំដីជាដើម ដើម្បីសម្រួលឱ្យមន្ត្រីជំនាញ ធ្វើការកែតម្រូវឡើងវិញ ឱ្យបានត្រឹមត្រូវ មានតម្លាភាព សំដៅពន្លឿនដល់ការចេញ ប័ណ្ណកម្មសិទ្ធិប្រើប្រាស់ស្របច្បាប់ជូនប្រជាពលរដ្ឋ។
ការអំពាវនាវនេះធ្វើឡើងនៅក្នុងពិធីបិទផ្សាយជាសាធារណៈនូវឯកសារ នៃការវិនិច្ឆ័យក្នុងការចុះបញ្ជី ដីធ្លី ដែលមានលក្ខណៈជាប្រព័ន្ធ នៅភូមិអន្លង់ធំ ភូមិកូនជ្រែ និងភូមិព្រែកគ្រួស ក្នុងឃុំព្រែកអំបិល ស្រុកស្អាង ខេត្តកណ្តាល នាព្រឹកថ្ងៃទី២០ ខែតុលា ឆ្នាំ២០២១ ដែលមានក្បាល់ដីចំនួន៣៥៣៣ក្បាលដី ។
លោក ព្រំ ឆាត បានបញ្ជាក់ថា នេះជាដំណាក់កាលចុងក្រោយហើយ មុននឹងយកទិន្នន័យដែលបានបិទផ្សាយនេះទៅបោះពុម្ពជាប័ណ្ណកម្មសិទ្ធិ ប្រគល់ ជូន បងប្អូន ប្រជាពលរដ្ឋ ហើយការបិទផ្សាយក្បាលដីនេះ គឺមានរយៈពេលតែ១៥ថ្ងៃប៉ុណ្ណោះ ដោយគិតចាប់ពីថ្ងៃទី២០ ខែតុលា ដល់ថ្ងៃទី០៣ ខែវិច្ឆិកា ឆ្នាំ២០២១។
លោកបានបញ្ជាក់ទៀតថា ក្នុងរយៈពេលនេះគឺបងប្អូនប្រជាពលរដ្ឋអាចប្តឹង ឬជំទាស់តវ៉ាបានមកក្រុមមន្ត្រីជំនាញ ដែលនៅប្រចាំការជាប្រចាំគិតទាំងថ្ងៃឈប់សម្រាក់ ប្រសិនបើក្នុងករណីរកឃើញថាមានកំហុសណាមួយលើទិន្ន័យក្បាលរបស់ខ្លួន ដើម្បីឱ្យមន្ត្រីជំនាញធ្វើការកែសម្រួលឱ្យត្រឹមត្រូវឡើងវិញ។
ថ្លែងក្នុងពិធីនេះដែរ លោក ញឹម វណ្ណឌិន អភិបាលស្រុកស្អាង បានមានប្រសាសន៍ថា ការចុះបញ្ជីរដីមានលក្ខណជាប្រព័ន្ធ គឺពិតជាមានសារៈសំខាន់ណាស់ក្នុងដំណើរនៃការចេញប័ណ្ណកម្មសិទ្ធិដីធ្លីជូនប្រជាពលរដ្ឋបានត្រឹមត្រូវ ដើម្បីការបង្កើនសុវត្ថិភាពលើការកាន់កាប់ និងប្រើប្រាស់ដីធ្លីស្របច្បាប់ ស្របតាមប្លង់គោល និងប្លង់ហេដ្ឋារចនាសម្ព័ន្ធរបស់ស្រុក កាត់បន្ថយទំនាស់ដីធ្លី ធ្វើអោយដីមានតម្លៃងាយស្រួលក្នុងការទិញលក់។
លោកអភិបាលស្រុកស្អាង បានបន្តទៀតថា ដើម្បីអោយដំណើរការនៃការបិទផ្សាយនេះ មានភាពរលូន អាជ្ញាធរមូលដ្ឋាន ត្រូវផ្តល់កិច្ចសហការអោយបានជាប់ជាប្រចាំជាមួយមន្រ្តីជំនាញ និង ប្រជាពលរដ្ឋជាម្ចាស់ដី ក្នុងការជួយពិនិត្យនូវទិន្ន័យក្បាលដីឱ្យបានត្រឹមត្រូវ និងច្បាស់លាស់ផងដែរ៕ដោយ ភាវុន
