ខេត្តកំពង់ឆ្នាំង :ដោយសារតែស្ថានភាពទឹកភ្លៀងនៅតែបន្តធ្លាក់ជាប់ៗគ្នានៅផ្នែកខាងលើ បានធ្វើឱ្យកំណាត់ផ្លូវជាតិលេខ 5 ត្រង់ចន្លោះគីឡូម៉ែត្រលេខ 49 ចំណុចស្ពានជ្រលងម៉ៅ ស្ថិតក្នុងភូមិតាកុល ឃុំពានី ស្រុកកំពង់ត្រឡាច កើតមានជំនន់បណ្តាលអោយលិចលង់ជាខ្លាំងនិងបានធ្វើឱ្យស្រូវស្រែរបស់បងប្អូន ប្រជាពលរដ្ឋមួយចំនួនផ្នែកខាងក្រោមនិងខាងលើផ្លូវត្រូវបានរងការលិចខូចខាត ។
បើទោះបីជាយ៉ាងនេះក្តីអាជ្ញាធរស្រុក រួមនឹងសមត្ថកិច្ចនគរបាល បានសហការគ្នាជាមួយក្រុមហ៊ុនធ្វើផ្លូវរបស់ជប៉ុន បានធ្វើការកកាយលូដើម្បីរំដោះទឹកតាំងពីយប់ថ្ងៃទី 18 រហូតដល់រសៀលថ្ងៃទី 19 ខែកក្កដា និងបានកំពុងតែនៅដំណើរការជាប់នៅឡើយ ។
អធិការនគរបាលស្រុកកំពង់ត្រឡាច លោក វរះសេនីយ៍៉ក នន់ស៊ីណាត់ បានអោយដឹងថាជំនន់ទឹកភ្លៀងបានធ្លាក់ ពី ផ្នែកខាងលើ គឺទ្វារទឹកអន្លង់ត្បាល់ ហើយធ្លាក់ពីលើមកជន់លិចលើផ្លូវជាតិលេខ 5 ដោយមិនអាចហូរចុះទៅក្រោមបាន ទាន់ពេល ព្រោះតែស្ថានភាពផ្លូវកំពុងតែធ្វើការជួសជុលកែលម្អដោយឡែកប្រព័ន្ធលូរំដោះទឹកបណ្ដោះអាសន្នក៍តូចពេក ។
អធិការនគរបាលស្រុកកំពង់ត្រឡាចបន្តថា មកដល់រសៀលថ្ងៃទី 19 ខែកក្កដានេះ លោកកំពុងតែឈរសម្រួលចរាចរណ៍នៅឡើយ ដើម្បីឲ្យក្រុមហ៊ុនរៀបចំធ្វើផ្លូវវាងទៅវិញទៅមកឱ្យបានសម្រួលចរាចរណ៍ក្នុងធ្វើដំណើរ របស់ប្រជាពលរដ្ឋតាមផ្លូវជាតិលេខ 5 នេះផងដែរ។
បើយោងតាមសេច្តីជូនដំណឹងរបស់អាជ្ញាធរស្រុកកំពង់ត្រឡាច រួមនឹងភាគីជប៉ុន ដែលកំពុងធ្វើផ្លូវ បានបញ្ជាក់ថាមូលហេតុ 3 យ៉ាងដែលបណ្ដាលឲ្យជន់លិចខ្លាំងនៅចំណុចស្ពានជ្រលងម៉ៅក្នុង ភូមិតាកុល ឃុំ ពានី គឺដោយសារទី 1 ភ្លៀងជាប់ៗគ្នា.ទី2 ដោយសារផ្លូវវាងស្ពាន ដាក់លូតូចពេក និងទី 3ស្ពានចាក់បេតុងបានមួយចំហៀងមិនទាន់ប្រើការបាននៅឡើយហើយត្រូវកកាយផ្លូវវាងដោយយប់ មិញ(ថ្ងៃ១៨កក្កដា)តម្រូវអោយកម្លាំងធ្វើការទាំងយប់ដោយធ្វើឲ្យស្ទះចរាចរណ៍មួយរយៈផងដែរ ។
អជ្ញាធស្រុកក៍ដូចជាខាងសាងសង់ផ្កូវជប៉ុនបានសូមការយោគយល់ពីបងប្អូនដែលធ្វើដំណើរតាមផ្លូវជាតិលេខ៥នេះមេត្តាអធ្យាស្រ័យផង៕ដោយ សុក្ខារិន
