កណ្តាល ៖ មានករណីគ្រោះអគ្គិភ័យឆេះរោងចក្រខ្សែភ្លើងឃ្យុងស៊ីង បង្កការភ្ញាក់ផ្អើល នាថ្ងៃទី២៤ ខែមីនាឆ្នាំ២០២១ វេលាម៉ោង៨ព្រឹក ស្ថិតនៅតំបន់សេដ្ឋកិច្ចពិសេស(7NG) ភូមិវិហារសួគ៌ ឃុំវិហារសួគ៌ ស្រុកខ្សាច់កណ្ដាល ខេត្តកណ្ដាល ខណៈកម្មករកំពុងធ្វើការ បណ្តាលឱ្យកម្មករម្នាក់របួស និង ឆេះរោងបាយកម្មករទាំងស្រុង។សមត្ថកិច្ចនិយាយថា បន្ទាប់ពីមានហេតុការណ៍កើតឡើង លោក ប៊ុន ផេងអភិបាលស្រុកខ្សាច់កណ្ដាល,លោក អ៊ុ ចន ប្រធានក្រុមប្រឹក្សាស្រុកខ្សាច់កណ្ដាល ដឹកនាំបញ្ជាផ្ទាល់ និងអាជ្ញាធរភូមិ-ឃុ ,កងរាជអាវុធហត្ថ,ប៉ូលិសប៉ុស្តិ៍វិហារសួគ៌រួមទាំងកម្មករ រោងចក្របានរួមកម្លាំងសាមគ្គីគ្នាជួយពន្លត់ទាន់ពេលវេលា។
សមត្ថកិច្ចបន្តថា ម្ចាស់រោងចក្រឈ្មោះ ចាង សាងហូ ភេទប្រុស អាយុ ៤៦ឆ្នាំជាជនជាតិកូរ៉េខាងត្បូង មានកម្មកររោងចក្រមានចំនួន១៦៧៥នាក់ស្រី១៣១៨នាក់ ដែលកំពុងធ្វើការងារ ។រោងចក្រដែលឆេះមានបណ្ដោយ១២០ម៉ែត្រទទឹង៨០ម៉ែត្រ ភ្លើងបានឆេះរោងបាយកម្មករទំហំបណ្ដោយ៨០និងទទឹង១៥ម៉ែត្រ ។
សមត្ថកិច្ចបន្តថា ករណីនេះបណ្ដាលឱ្យមានកម្មករម្នាក់រងរបួសស្រាលឈ្មោះ ភឹម រដ្ឋា ភេទប្រុស អាយុ២៤ឆ្នាំ រស់នៅភូមិព្រៃចាស់ឃុំវិហារសួគ៌ស្រុកខ្សាច់កណ្ដាល ជាកម្មករផ្នែកជាង។ ខូចខាតសម្ភារៈមានម៉ាស៊ីនភ្លើងធំចំនួន០១គ្រឿង, ម៉ាស៊ីនស្កេនក្រយ៉ៅដៃ១៥គ្រឿង, តុបាយ, កៅអី និង កង្ហាមួយចំនួន។តាមការសន្និដ្ឋានរបស់សមត្ថកិច្ចថា មូលហេតុដោយសារទុស្សេខ្សែភ្លើង នៅក្បែររោងបាយហើយ បានឆាបឆេះផ្នែករោងម៉ាស៊ីនរហូតដល់រោងបាយតែមិនឆេះ ចូលកន្លែង កម្មករធ្វើការឡើយ ។ខណៈនោះសមត្ថកិច្ចជំនាញសណ្ដាប់ធ្នាប់ចរាចរណ៍ស្រុកខ្សាច់កណ្ដាល បានប្រើរថយន្តពន្លត់អគីភ័យស្រុកខ្សាច់កណ្ដាល០១គ្រឿងនិងរថយន្តទឹក(7NG)ចំនួន០២គ្រឿង ប្រើប្រាស់ទឹកអស់ចំនួន២៥គូប ទើបរលត់ទាំងស្រុង ៕ដោយ ភាវុន
